Tregu i naftës së papërpunuar në dy muajt e fundit është jashtëzakonisht i paqëndrueshëm. Pas goditjeve të larta drejt fundit të korrikut, këtë javë, pra në fillim të gushtit, pati një rënie të mprehtë të çmimeve të naftës së papërpunuar, pas së cilës në dy ditët e fundit ka një korrigjim të lehtë në rritje.
Analistët që ndjekin lëvizjet në bursat botërore, thonë se është shumë e vështirë të jepet një parashikim se si do të lëvizin çmimet e naftës së papërpunuar, por për momentin tregojnë se nuk pritet rritje, por se do të ketë stabilizim të çmimit dhe rënie në vitin e ardhshëm.
“Sipas analizave më të fundit të disponueshme, Goldman Sachs pret që çmimi i naftës së papërpunuar në vitin 2025 të jetë 64 dollarë për fuçi, ndërsa në vitin 2026 të bjerë në 56 dollarë. JP Morgan, nga ana tjetër, parashikon 66 dollarë për vitin 2025 dhe 58 dollarë për 2026. Ndërkohë Administrata Amerikane për Informacion në fushën e energjisë pret që çmimi mesatar të jetë nën 70 dollarë për fuçi për vitin 2025 dhe përsëri të bjerë në 58 dollarë për vitin 2026. Analizat tona, të përputhura me këto vlerësime globale, tregojnë një trend të uljes së çmimit të naftës së papërpunuar në periudhën e ardhshme”, tha Mario Gjorgjiev, VFP Fond Management.
Këto pritshmëri për stabilizimin e çmimeve bazohen në disa tregues. Ndër to është paralajmërimi për rritje të prodhimit të naftës së papërpunuar nga anëtarët e OPEC PLUS, kryesisht për shkak të stabilizimit të ekonomisë dhe kërkesës së pritur disi më të lartë nga sektori i transportit. Por kjo do të kompensohet me faktorë të tjerë negativë.
“Sipas analizave tona, kërkesa për momentin nuk tregon rritje eksplozive, ndërsa oferta shtesë e paralajmëruar sjell rrezik potencial për presion të ulët mbi çmimet e naftës. Sidomos nëse ndodh ngadalësim ekonomik në ndonjë prej konsumatorëve të mëdhenj si Kina apo SHBA. Aspekti pozitiv do të ishte që çmimi eventualisht më i ulët i naftës mund të ketë ndikim stimulues në aktivitetin ekonomik global përmes uljes së kostove për energji dhe transport”, u shpreh tha Mario Gjorgjiev, VFP Fond Management.
Sipas Gjorgjiev, çmimi i naftës gjithmonë ka qenë i ndjeshëm ndaj ngjarjeve gjeopolitike, dhe aktualisht ka disa lëvizje të kundërta në treg. Nga njëra anë, OPEC po rrit prodhimin, që do të thotë ofertë më e madhe dhe presion potencial për uljen e çmimit të naftës, por nga ana tjetër, SHBA po ushtrojnë presion mbi Indinë që të ulë blerjet nga Rusia, gjë që mund të ridrejtojë kërkesën dhe të krijojë presion në rritje mbi çmimin. Shtesë, ekziston një rrezik real që tarifat e reja që po i vendosin SHBA të çojnë në ngadalësim të ekonomisë së tyre, që do të thotë edhe kërkesë më e vogël për naftë, gjë që përsëri do të krijonte presion për uljen e çmimit. Gjithashtu, e gjithë kjo do të ndryshonte nëse ka një armëpushim eventual mes Rusisë dhe Ukrainës.