A do të realizohen premtimet e Zyberit dhe BDI-së? Pandemia fajtor për projektet e parealizuara të Qeverisë

Këto janë pjesë e premtimeve të BDI-së dhe kandidatit të tyre të atëhershëm për kryeministër, Naser Zyberi. 100 ditë kaluan që nga formimi i Qeverisë, Zyberi nuk është pjesë e saj ndërsa parashtrohet pyetja nëse ato premtimet do të realizohen. Premtimet e tij janë pjesë e programit qeveritar të LSDM-së dhe BDI-së, por në format të ndryshëm. Megjithatë, për mosrealizimin e tyre, fajtor është pandemia me Kovid-19, thanë kryeministri dhe zëvendësi i tij i parë. Kryeministri Zoran Zaev tha se pjesë e projekteve nuk mund të zbatohen për shkak të pandemisë me Kovid-19, por vetëm mund të përgatiten në formë të ligjeve të cilat pas përfundimit të pandemisë do të fillojnë të realizohen.

“Një pjesë e punëve, jo vetëm për këtë çështje, e njëjta vlen edhe për të tjerat, është e pamundur të realizohen në një valë kaq të madhe të pandemisë, por kjo nuk do të thotë se përgatitjet bazike në formë tekstesh, vendimeve ligjore nuk kanë filluar, me qëllim që të mund të realizohen në momentin kur do të kalojë vala e Covid-19”, theksoi Zoran Zaev – Kryeministër i Maqedonisë së Veriut.

Zv/kryeministri i parë Artan Grubi u përgjigj se këto premtime janë adresuar dhe kanë filluar si proces, por nuk dha përgjigje konkrete se pse nuk janë zbatuar duke marrë parasysh se ishin premtime parazgjedhore?!

“Këto janë premtime të cilat nuk mund të realizohen brenda 100 ditëve të para, por në kuadër të një mandati të tërë”, deklaroi Artan Grubi – Zëvendëskryeministër i parë i Qeverisë.

Grubi pohon se vetingu ka filluar dhe i njëjti është ndër prioritetet e qeverisë.

“Në qoftë se zbatohet veting ose pastrim në gjyqësor dhe nëse arrijmë të ketë drejtësi joselektive dhe kredibilitet të institucioneve, prokurorive dhe gjyqësorit, kjo do të sjellë barazi në sundimin e së drejtës dhe do të ketë besueshmëri të plotë të qytetarëve, me çka do ta arrijmë qëllimin dhe do ta plotësojnë atë që ua kemi premtuar qytetarëve”, potencoi zëvendëskryeministri i parë, Artan Grubi.

Grubi iu përgjigj vetëm një pyetjeje dhe u largua për shkak të obligimeve të tjera. Përveç kryeministrit këtu ishte edhe ministri për luftë kundër korrupsionit dhe zv/kryeministër për çështje evropiane, të gjithë të tjerë ishin përfshirë në veglën ZYM, shkaku mbrojtje nga pandemia me Kovid 19.

Në ekspozetë e tyre u lëvduan me punën e tyre edhe pse kjo është shumë pak në krahasim me atë që e kanë premtuar. Të gjitha premtimet janë në proces, përveç asaj që Maqedonia u bë anëtare e NATO-s, një nga premtimet më të mëdha, por nuk i filloi negociatat me BE-në.