“5 deputetë” vija e kuqe e Ziadin Selës! Për Ahmetin numrat nuk kanë rëndësi, por vizioni dhe ardhmëria

Ndonëse ka një vendim të kryesisë qendrore që do të garojnë vetë në zgjedhje, megjithatë Aleanca për Shqiptarët ka filluar bisedimet për t’u bashkuar me Frontin Europian. Kreu i kësaj partie Ziadin Sela në ClickPlus tha se ASH do të duhet të vendosë nëse do të shkojë me njërin prej dy blloqeve, pra me Frontin Europian ose me VLEN, ose të mos garojë fare në zgjedhje. Kjo për shkak se siç u shpreh, vulat partiake janë tek Taravari dhe nuk mund të dorëzojnë listat e deputetëve. Pengesë tjetër për ASH-në është vonesa e vendimit të Gjykatës së Tetovës për atë se kujt do t’i përkasë partia. Sela pret ofertë konkrete nga Fronti Europian, që të njëjtën ta dorëzojë para Kuvendit qendror të partisë.

“Brenda këtyre ditëve, në qoftë se vjen ndonjë ofertë që ia vlen të diskutohet, do të hidhet përpara Kuvendit Qendror dhe Kuvendi Qendror do të vendosë, a do të përkrahet ajo ofertë apo jo. Për t’u pastruar dilemat, ky është momenti”, tha Ziadin Sela.
Ofertën e pritni prej z.Ali Ahmetit apo jo, prej BDI-së?
“Bisedime ka me Frontin për Europë, flas me ata që ka bisedime. Me të tjerët nuk e kanë parë të arsyeshme të bisedojmë”, deklaroi Sela.

Sela kërkon së paku 5 deputetë, me qëllim që të mund të formojë grup parlamentar në përbërjen e ardhshme kuvendore.

 “Ka instruksione mirëpo instruksionet nuk janë që Ziadin Sela të jetë bartës liste në zonën 6 apo 7. Instruksionet janë që, vija e kuqe, Aleanca për Shqiptarët duhet të ketë grup parlamentar pas zgjedhjeve të 8 majit dhe kjo është vija e kuqe e Aleancës për Shqiptarët”, u shpreh Ziadin Sela.

E për kreun e BDI-së Ali Ahmeti, këto kërkesa janë gjëra të vogla. I pyetur nga TV21 rreth kësaj, Ahmeti tha se nuk duhet të diskutohet për numra por për vizion dhe ardhmëri.

“Për gjëra të vogla, projekte të mëdha ne asnjëherë as nuk i cenojmë as nuk i lëndojmë. Kështu që nuk bëhet fjalë këtu për numra, bëhet fjalë për filozofi, për vizione dhe për ardhmëri”, tha Ahmeti.

Përndryshe Aleanca për Shqiptarët për nesër e ka thirrur Kuvendin Qendror e ku duhet të vendoset se cilën rrugë do ta merr lidhur me pjesëmarrjen në zgjedhjet parlamentare të 8 majit.