Autoritetet turke kanë arrestuar disa kryetarë komunash në një seri aksionesh të drejtuara ndaj politikanëve të opozitës, raportoi sot agjencia “Anadolu”.
Në operacionet janë arrestuar gjithsej 59 persona të dyshuar, mes tyre edhe Vahap Seçer, kryetar i qytetit jugor Mersin. Ata përballen me akuza për korrupsion lidhur me parregullsi të pretenduara në tenderët publikë, raportoi DPA.
Seçer, anëtar i Partisë Republikane Popullore (CHP) në opozitë, fitoi rreth 60 për qind të votave në zgjedhjet lokale të marsit 2024.
Në ato zgjedhje, CHP fitoi numrin më të madh të posteve të kryetarëve të komunave në nivel kombëtar, duke i shkaktuar një goditje të rëndë Partisë për Drejtësi dhe Zhvillim (AKP) të presidentit Rexhep Tajip Erdogan.
Që atëherë, disa zyrtarë të opozitës janë arrestuar ose burgosur.
Ndër ta më i njohuri është ish-kryetari i Stambollit, Ekrem Imamoglu, një nga rivalët kryesorë politikë të Erdoganit.
Qeveria mohon çdo ndërhyrje në punën e gjyqësorit.
Ozgur Ozel, ish-lider i CHP-së, u shkarkua nga detyra me vendim gjykate në maj, pas së cilës themeloi “Partinë e Re”. Ajo më vonë u bë forca më e madhe opozitare në vend, pasi një numër i madh deputetësh iu bashkuan, ndërsa anëtar u bë edhe Imamoglu, kujton DPA.