Mbi 50 mijë gra dhe vajza në vit vriten nga partneri intim ose një anëtar i familjes. Kjo u theksua në konferencën rajonale për femicidin në Evropën Juglindore, që nisi sot në Kuvend, përcjell TV21. Sipas të dhënave të prezantuara, në vitin 2024 në botë u vranë 83 mijë gra dhe vajza. Rreth 50 mijë prej tyre u vranë nga partneri ose një anëtar i familjes, që do të thotë mesatarisht 137 gra dhe vajza çdo ditë.
Në konferencë u theksua se femicidi nuk duhet të shihet si problem privat familjar, por si pasojë e dhunës së vazhdueshme me bazë gjinore. Nënkryetarja e Kuvendit, Vesna Bendevska, tha se rajoni ka përparuar në kuadrin ligjor, por mbeten probleme me të dhënat dhe zbatimin e ligjeve. Maqedonia e Veriut ka forcuar qasjen ligjore ndaj dhunës me bazë gjinore, përfshirë ndryshimet e Kodit Penal në vitin 2023.