60 ditë afat për t’i larguar kamp-shtëpizat nga Treska! Kampistët thonë se nuk janë të informuar, paralajmërojnë protestë!

Këta qytetarë po e kalojnë vikendin e fundit në këto kamp-shtëpiza. Komuna e Sarajit ka sjellë vendim të largohen të gjitha kamp-shtëpizat nga liqeni Treska. Për këtë vendim pronarët e kampeve thonë se nuk janë të informuar.

“Për së pari herë prej juve po e dëgjojmë këtë, por nuk e dimë se çfarë po ndodh çfarë janë qëllimet, çfarë qëllimi kanë, nga kush nga Komuna e Sarajit , nëse është nga Komuna e Sarajit ato janë dëshirat e tyre, apo qëllim që të bëhet diçka, e çfarë dëshire kanë nuk e dimë ne si kampistë”, tha një kampist.

Kampistët thonë se do të kontaktojnë edhe me Qytetin e Shkupit, dhe se do të protestojnë para Qeverisë dhe komunës me gjithë kamp-shtëpizat e tyre.

“Mirë nëse ata i largojnë, ne do t’i dërgojmë ose tek Qeveria ose para Qytetit të Shkupit dhe le të mendojnë se çfarë do tu bëjnë 500 kamp-shtëpizave.  Kjo duhet të rregullohet dhe në këtë mënyrë nuk është zgjidhje ”, tha një kampist.

Komuna e Sarajit me shkrim ka lajmëruar të gjithë kampistët që t’i largojnë brenda 60 ditëve kamp-shtëpizat. Në komunikatën e komunës së Sarajit tregojnë edhe arsyen e këtij vendimi.

“Ky vendim pason pasi, Inspektorati i mjedisit hapësinorë ka konstatuar se ndotje të ajrit enorme, papastërti, instalim i vjetruar energjetik, ujësjellës dhe kanalizim jo funksional dhe infrastrukturë të shkatërruar, dhe për këtë ekziston rrezik i lartë për shëndetin e njerëzve, dhe për këtë kërkohet urgjentisht dislokim i kamp-shtëpizave nga ky lokalitet”, thonw nga Komuna Saraj.

Pronarët e kamp-shtëpizave thonë se kanë investuar në kampet e tyre dhe se kanë qenë pagues të rregullt  të qirasë. Qiraja që kanë paguar është 200 euro në vit.

Ndryshe sipas Komunës së Sarajit, Këshilli komunal ka miratuar vendim për ndryshimin e planit urbanistik të Liqenit të Treskës, me çka nga Ministria e Ekonomisë kërkohet që Liqeni Treska të shpallet zonë turistike zhvillimore.