5 mijë skafanderë dhuratë për Çairin! Koka: Jo që kemi mungesë, por këto skafanderë janë me cilësi të lartë

5 mijë skafanderë do të shpërndahen në tre institucione shëndetësore që gravitojnë në Komunën e Çairit, gjegjësisht në Spitalin gjinekologjik, Shtëpinë e shëndetit publik dhe Poliklinikën e Çairit. Këtë donacion me vlerë prej 30 mijë eurove e ka dhënë kompania ATS Group. Në shenjë falënderimi, pronarit të kompanisë Shefket Demirit,  kryetari i komunës së Çairit Visar Ganiu i dha pllakatë dekorative me figurën e Nënës Terezë.

Ndërsa Demiri nuk deshi të prononcohet para kamerave.

 “Pasi që zotri Demiri është modest dhe më pak do të flas, por të bën më shumë vepra”, tha Visar Ganiu – Kryetar i Komunës së Çairit.

Përse pikërisht këto skafanderë po u dhurohen komunës së Çairit dhe mos vallë ka mungesë të mjeteve mbrojtëse? Besim Koka drejtori në Shtëpinë e shëndetit thotë se këso lloj skafandërë të kualitetit të lartë nuk posedojnë, por nuk kanë mungesë  se mjeteve mbrojtëse.

 “Sa e shoh këto skafanderë janë profesioniste dhe më kualitative. Këto do t’i përdorim te ndihma e shpejtë më shumë ku kemi ekipe speciale që bëjnë transportin e pacientëve me Kovid. Gjithsesi do të na dalin në ndihmë. Kjo nuk do të thotë se s’kemi mjete.  Këtë lloj nuk kemi me të vërtetë se janë shumë kualitative dhe më profesionale për këso lloj të punës. Mendoj se do të na hyjnë në punë shumë”, u shpreh Besim Koka – Drejtor Shtëpia e Shëndetit Publik.

Nga komuna e Çairit thonë se çdo ndihmë është e mirëseardhur dhe se qëllimi i donacionit është përkrahja e personelit mjekësor që po udhëheq një betejë heroike për të shpëtuar jetët e qytetarëve.