Ministri i shëndetësisë Arben Taravari njoftoi për gjendjen e pacientëve të cilët pësuan lëndime në
Tragjedinë e Koçanit. Sipas tij 4 pacientë të cilët po trajtohen jashtë vendit janë në gjendje kritike, ndërsa 8 të tjerë pritet që gjatë kësaj jave të kthehen në vend.
“Sot janë 4 pacient kritik por përsëri mos t’i marrim këto numra definitive, pasi që jemi në fazën e infeksioneve pasi që mund të zhvillojnë pacientët dhe mundet që në çdo moment të zhvillohen komplikime të reja, por shpresoj dhe uroj që kolegët tanë jashtë shtetit e japin maksimumin që të kthehen ashtu siç duhet dhe pa asnjë pasojë”, tha Arben Taravari, ministër i Shëndetësisë.
Për të lehtësuar procesin e rehabilitimit të pacientëve të lënduar të cilët ndodhen në Koçan dhe Shtip, Taravari bëri të ditur se një ekip i kirurgëve plastikë do të dërgohet në atë rajon me qëllim që pacientët të shmangin udhëtimin e vazhdueshëm në qytete të tjera për trajtim.
“Në Spitalin e Shtipit tashmë janë katër kirurgë plastikë, do të jemi në komunikim, gjithsesi do t’u japim mbështetje që të mos udhëtojnë ata, por mjekët tanë të shkojnë dhe t’u ndihmojnë çfarë duhet. Disa pacientë do të kenë nevojë për dy javë rehabilitim, ndërsa për të tjerët mund të zgjasë me muaj”, shtoi Arben Taravari, ministër i Shëndetësisë.
Ministri Taravari bëri të ditur se sot nga spitalet vendore pritet të dalin 16 pacientë, ku gjithsej janë duke u trajtuar 46. Në Qendrën Klinike po mjekohen 26 pacientë dhe nga 10 në spitalin ushtarak “8 Shtatori” dhe Shën Naumi i Ohrit, në spitalet private janë 8 pacientë. Në mjekim jashtë vendit janë 115 pacientë.