Ligji për Regjistrim të Popullsisë, i cili është në procedurë parlamentare e bllokon punën e Entit Shtetëror të Statistikës, i cili nuk mund t’i zbatojë aktivitetet në terren siç janë: formimi i komisioneve që do ta kryejnë regjistrimin, zgjedhjen e regjistruesve, zgjedhjen e instruktorëve rajonal, thotë Jovan Sapunxhioski, udhëheqës i Sektorit për Statistika Sociale pranë entit.
“Shumë nga përgatitjet kanë përfunduar. Tani pritet që të miratohet ligji i cili është në procedurë ligjore dhe të cilin e presim në çdo moment që të mund të fillojmë me disa aktivitetet në terren që janë të nevojshme për regjistrimin, për formimin e komisioneve të regjistrimit, zgjedhjen e regjistruesve, zgjedhjen e instruktorëve rajonal”, tha Jovan Sapunxhioski – Udhëheqës i Sektorit për Statistika Sociale të ESHS.
Sapunxhioski shton se pandemia mund të ndikojë mbi zbatimin e regjistrimit, por konsideron se i njëjti do të përfundojë suksesshëm.
“Ne jemi duke u përgatitur sikur nuk ka pandemi. Të gjitha përgatitjet siç janë planifikuar sipas programit pune për regjistrimin, kanë përfunduar. E presim Ligjin për Regjistrim dhe të fillojnë ngadalë. Megjithatë, pandemia mund të ketë ndikim dhe rol në këtë çështje, por ne besojmë se do ta zbatojmë me sukses këtë aksion, i cili nuk është zbatuar tashmë 18 vjet”, potencoi Jovan Sapunxhioski – Udhëheqës i Sektorit për Statistika Sociale të ESHS.
VMRO-DPMNE nuk do ta mbështesë dhe nuk do ta respektojë regjistrimin, kurse Qeveria e ardhshme do të zbatojë një regjistrim të besueshëm sipas të gjitha standardeve të EUROSTAT-it dhe institucioneve të tjera të Kombeve të Bashkuara, tha sot në konferencë për shtyp anëtari i Komitetit Ekzekutiv të partisë, Stefan Andonovski.
“Përse nuk publikohet metodologjia e regjistrimit, e cila duhej të ishte pjesë e integruar e Ligjit për Regjistrim me qëllim që të gjithë të mund ta shohin? Pse LSDM-ja është kundër terminaleve për gjurmët e gishtave të cilat sigurisht duhet të sigurohen sepse është detyrim ligjor për zgjedhjet lokale që do të mbahen këtë vit”, u shpreh Stefan Andonovski – Deputet i VMRO-DPMNE-së.
Nga Aleanca për Shqiptarët dhe Alternativa kanë kërkuar që regjistrimin ta zbatojë Komisioni Shtetëror i Regjistrimit, e jo Enti i Statistikës.
“Kemi amendamente posaçërisht rreth afatit që duhet të përfundojë regjistrimi, të jetë deri më 30 prill që të mos mbetet ndonjë njësi e paregjistruar. Ne do të kërkojmë që realizimin mos ta bëjë Enti për Statistikë për shkak se si koalicion nuk kemi besim në asnjë institucion një-nacional në të cilin nga 9 vende udhëheqëse, nuk ka asnjë shqiptar”, deklaroi Skender Rexhepi – Koalicioni “Tash është Koha”.
Për shumicën qeverisëse nuk janë të pranueshme as kërkesat e VMRO-DPMNE-së, e as të ASH-AAA. Regjistrimi nuk duhet dhe nuk do të varet nga vullneti i partive politike dhe liderëve të tyre, thonë nga LSDM.
“Regjistrimi i popullsisë si operacion statistikor sipas standardeve më të larta të BE, do ta organizojë dhe do ta zbatojë Enti Shtetëror për Statistikë. Me propozim-ligjin për regjistrim kemi për qëllim që ky operacion statistikor, tani, por edhe në të ardhmen, të mos trajtohet si çështje politike. Ata tani dalin me një propozim për fingerprint. Unë dua të parashtroj vetëm një pyetje – a dëshirojnë ata që me të vërtetë të kemi Regjistrim të Popullsisë në vitin 2021 apo jo”, tha Snezhana Kalleska Vançeva nga LSDM.
Qeveria paralajmëroi se sivjet do të zbatohet Regjistrimi i Popullsisë, i pari pas 18 vjetëve. Ligji është në procedurë parlamentare dhe pritet pas 18 janarit të gjendet në seancë për miratim.
Maqedonia në vitin 2011 tentoi të zbatojë regjistrim, por dështoi. Kjo çështje në vend ka domethënie të madhe politike, sepse të drejtat etnike, sipas Kushtetutës dalin nga përqindja e popullsisë. Brukseli në Raportin e fundit të Komisionit Evropian, ka vërejtur se Regjistrimi i Popullsisë doemos duhet të zbatohet në vitin 2021.