10 vatra të zjarrit janë akoma aktive në Shqipëri

Situata e zjarreve vijon të jetë shqetësuese në veri dhe juglindje të Shqipërisë.

Në “Majën e Rrunës” në Kukës vijon të jetë aktive vatra e zjarrit në vendin e quajtur “Laku i Mollave”. Situata ka qenë kritike gjatë mbrëmjes pasi ka qenë e vështirë të ndërhyhet nga toka dhe e vetmja mënyre ka qenë ndërhyrja nga ajri. Mësohet se sot nga bashkia janë angazhuar 10 forca të MZSH-së 8 punonjës të pyjores dhe Njësisë Administrative Malzi si dhe 10 forca nga komuniteti. Ndërkohë në pjesët ku ka vatra të aktivizuara ka nisur tashmë edhe ndërhyrja nga ajri.

Sipas njoftimit të Ministrisë së Mbrojtjes ka vijuar puna e forcave operacionale për shuarjen e zjarrit në fshatin Patalej, të njësisë administrative Kolsh, në Lezhë, ku situata nuk paraqet rrezik për banesat.
Zjarri në fshatin Thirrë, njësia administrative Fan, bashkia Mirditë ka zgjeruar pak perimetrin. Forcat operacionale po përballen me vështirësi për shkak të tymit të krijuar. Po punohet për izolimin e vatrës së zjarrit.
Në përmirësim është situata në “Majën e Rrunës”, Laku i Mollave dhe Laku i Thive, njësia administrative Malzi, bashkia Kukës, ku ka vijuar puna për shuarjen e vatrave të zjarrit. Në zonë po operon edhe një helikopter dhe nuk paraqitet rrezik për banesat apo forcat në terren.
Ka filluar prej mëngjesit ndërhyrja nga ajri për shuarjen e flakëve në malin e Tërbunit, bashkia Pukë, ku gjithashtu po punojnë mbi 150 efektivë të FA.
Jo e mirë paraqitet situata në vatrën e zjarrit në fshatin Flet, njësia administrative Blerimaj, bashkia F. Arrëz, pasi zjarri po përhapet me shpejtësi në drejtim të banesave. Ka filluar ndërhyrja nga ajri me helikopter.
Vatra zjarri ka gjithashtu midis fshatrave Kacni dhe Qafë Murrë, njësia administrative Selishtë, B. Dibër . Zjarri ka përmirësim në Qafë Murre, pasi ka kaluar në një terren shkëmbor dhe me bimësi të pakët.
Zjarri në fshatin Kacni, njësia administrative Selishtë bashkia Dibër, po zhvillohet me ritëm të shtuar në terren të vështirë, pa rrezik për banesat. Në këtë zonë zjarri është më i shtuar për shkak të bimësisë dhe drurëve të dendur. Po punohet nga forcat në terren për ta mbajtur larg zonës së banuar (pjesë e bashkisë Klos).