0% TVSh për produktet ushqimore bazë, TVSh-ja dhe akciza për derivatet e naftës nga 18% ulet në 10%

400 milionë euro përshihet t’i kushtojnë Qeverisë pakoja me 26 masat e miratuara për zbutjen e krizës ekonomike. Do të ketë ulje të TVSH-së nga 5 ne 0% për produktet ushqimore bazë si dhe ngrirje e marzhave. Parashihen edhe vauçerë për 35.000 qytetarë.

“Po ulim normën preferenciale të TVSH-së për produktet ushqimore bazë nga 5% në 0%. Produktet bazë për të cilat do të zbatohet kjo masë janë buka, sheqeri, mielli i llojit 400, vaji i lulediellit, qumështi, mishi i freskët, orizi dhe vezët. Do të ngrijmë marzhat e produkteve tjera ushqimore bazë. Do të ofrojmë kuponë për kategoritë më të rrezikuara të qytetarëve për produkte ushqimore bazë. Bëhet fjalë për bono me vlerë 1000 denarë në muaj për një periudhë 3 mujore për rreth 35 mijë qytetarë”, njofton kryeministri, Dimitar Kovaçevski.

Deri në fund të vitit TVSH-ja do të jetë 5% për energjinë elektrike, ndërsa hiqet edhe taksa ekologjike për energjencat, derisa TVSH-ja e derivateve të naftës ulet nga 18% në 10%. Parashihet edhe ulje e akcizës.

“Do të ulet norma e TVSH-së nga 18 në 10% në qarkullimin e burimeve të energjisë: naftë, benzinë pa plumb, gaz nafte, gaz të lëngshëm të naftës dhe metan. Do të ulim akcizën në bazë të çmimeve të bursës”, shton më tej Kovaçevski.

Mjetet financiare për këto masa do të sigurohen nga buxheti i shtetit.

“90milionë euro sigurohen nga heqja dorë nga të ardhurat ndërsa 310 milionë nga shpenzimet fiskale direkte nga buxheti për këtë set të masave, megjithatë për shkak se në vetë setin e masave përkrah masave afatshkurta ka edhe masa afatmesme që do të thonë përmirësim i strukturës së ekonomisë tonë”, sqaron ministri i Financave, Fatmir Besimi.

Masat e miratuara në Qeveri do të vlejnë vetëm pasi të njëjtat të miratohen në Kuvend. Për këtë kryeministri Kovaçevski u bëri thirrje deputetëve që të jenë të ndërgjegjshëm që mos të ketë prolongime por, në afat sa më të shkurtër të hyjnë në fuqi. Sipas kryeministrit, jemi duke u përballur me krizën më të madhe ekonomike të cilën Evropa dhe bota e kanë në kohën më të re dhe se para nesh është një vit i vështirë të cilin me masa dhe politika të mira do ta tejkalojmë. Qetësoi duke thënë se ka sasi të mjaftueshme të ushqimit dhe energjensave në rezervat e mallrave dhe Buxheti është stabil, likuid dhe në kondicion të plotë t’i financojë të gjitha obligimet dhe se nuk ka rrezik as për stabilitetin e denarit.