​Breshëri plumbash drejt lokalit, një i vdekur e katër të plagosur

Një 35-vjeçar ka humbur jetën dhe katër të tjerë kanë mbetur të plagosur, pas përplasjes me armë zjarri këtë pasdite në Tiranë.

Përplasja e armatosur raportohet të ketë ndodhur rreth orës 16:10, në zonën e “Don Boskos”, konkretisht në ambientet e një lokali.

Dyshohet se autori ka qëlluar jashtë lokalit drejt një tavoline ku po konsumonin kafenë pesë të rinj. Një prej tyre, i identifikuar si E.Ç, ka mbetur i vdekur në vend.

Të plagosurit janë 19-vjeçari A.S., i dëmtuar në shpatull, vëllai i viktimës, 28-vjeçari B.Ç., i plagosur në këmbë dhe fytyrë, 41-vjeçari E.C. dhe 46-vjeçari A.D.

Shërbimet e Policisë kanë ngritur pika kontrolli në të gjitha pikat hyrëse-dalëse të Tiranës dhe në brendësi të lagjeve ku dyshohet se janë larguar personat, të cilët pasi kanë qëlluar me armë zjarri, janë larguar me një automjet tip “Mercedes-Benz”.

Grupi hetimor ndodhet në vendngjarje dhe po punon për sqarimin e rrethanave të ngjarjes.