Lidhja Auto Moto e Maqedonisë njofton se nga ora 05:45 për shkak të reshjeve të borës, është vendosur ndalim qarkullimi për mjete të rënda mallrash në rrugën Gostivar-Kërçovë, përmes kalimit malor Strazhë, ndërsa nga ora 05:00 gjithashtu ka ndalesë edhe në rrugën Mavrovë – Dibër. Reshje bore me intensitet të ndryshueshëm mëngjesin e sotëm janë shënuar në Kodrën e Diellit, Resnjë, Krushevë, Strugë, Ohër, Dellçevë, Mavrovë dhe në qafat malore Bukovë, Xhavatë, Presekë dhe Pletvar.
Nga LAMM thonë se qarkullimi në rrugët shtetërore po zhvillohet në kushte dimri, nëpër rrugë të lagështa, në disa vende të larta me mbetje të borës në rrugë pas intervenimit të ekipeve rrugore të Maqedonisë. Ekipet kujdestare të NP Rrugët e Maqedonisë janë vazhdimisht në terren dhe i mbajnë të kalueshme të gjitha akset rrugore.
Ulje e dukshmërisë për shkak të mjegullës prej 30-40 metra mëngjesin e sotëm kishte në rrugën Tetovë – Kodra e Diellit dhe deri në 50 metra në qafën malore të Pletvarit.
Nga LAMM thonë se të gjitha akset rrugore në vend janë të kalueshme. Rrëshqitje më të vogla mund të ndodhin në akse të caktuara rrugore që kalojnë nëpër gryka dhe prerje.
Autoritetet apelojnë për drejtim të kujdesshëm të mjeteve, respektim të sinjalistikës së komunikacionit të vendosur, si dhe përshtatje të shpejtësisë sipas kushteve të rrugës.