40 ученици од Лешница – Желино ја бојкотираа наставата иако од МОН добиле одобрување за настава со физичко присуство. Родителите се револтирани поради тоа што училишниот објект е многу стар, изграден во 1976 година и според нив кровот на училиштето содржи канцероген материјал. Тие бараат да се изгради ново училиште.
„Ние побаравме да се држи настава, но не во ова училиште. Ние нема да ги пуштиме нашите деца на училиште, ние сме за бојкот бидејќи училиштето не ги исполнува условите за настава со физичко присуство. Не ги исполнуваме условите за онлајн настава бидејќи живееме од социјална помош, а треба да имаат лаптопи. Интернетот е многу слаб“
„Ние децата не ги пуштаме, дојдете и видите внатре каква катастрофа е. Нема да ги пуштиме и нема да дозволиме да влезат таму и да се разболат.“
„Ние 10 години бараме училиште, и донацијата која дојде од Швајцарија, градоначалникот кој зема многу малку гласови во селото, донацијата ја пренаменил за Чифлик и со парите на училиштето на Лешница е изградено училиштето во Чифлик.“
Директорот на централното училиште „Луиѓ Гуракуќи“, Зеќир Мемети потврди дека пред 15 години Образовниот инспекторат констатирал дека училиштето не ги исполнува условите за одржување на настава.
„Училиштето што го гледате е уникатно и единственото кое останало од монистичкиот систем и овде пред многу години Инспекторатот направи записник дека поради азбест, кој е канцероген материјал училиштето да се затвори и родителите тогаш не реагираа. Ние како училиште, како директор, заедно со секретарот се обидовме да му го понудиме тоа што можеме на училиштето, ги бојадисувавме просториите во училиштето кои не беа бојадисувани со години и со оглед на тоа дека имаше пандемија преземавме нешто.“, вели Мемети.
Жителите велат дека нивните деца не ги исполнуваат ниту условите за онлајн учење, бидејќи нивното село на некои места нема мрежа и децата не се опремени со лаптопи или компјутери за учење преку Интернет.Во ова училиште наставата ја следат од прво до петто одделение и потоа наставата ја продолжуваат во централното училиште во Желино.