Власта ќе слави за поканата за НАТО, опозицијата ќе протестира

1989
0
АКЦИЈА

 

 

Со добивањето на поканата за членство во НАТО, премиерот Зоран Заев од Брисел изјави дека Македонија чекори само напред. Тој најави дека во сабота ќе се прослави овој историски ден во 15 градови низ Македонија. Заев рече дека владата ќе организира прослава по повод добивањето покана и ги покани граѓаните да се приклучат на прославата, без разлика на нивното политичко убедување.

Од ДУИ велат дека евро-атлантските интеграции биле патоказ во нивните политички активности уште од почетоците на нивното дејствување и дека биле посветени на остварување на оваа цел. Од оваа партија додаваат дека сето тоа резултирало со заеднички успех.

„Целосната интеграција на нашата земја, но и на регионот во НАТО ја прави нашата слобода целосна, овозможува безбедност, стабилност, мир, добри меѓуетнички односи, економски развој и општествена благосостојба. Овие достигнувања се резултат на заедничката работа на нашите граѓани, политичките партии, граѓанскиот сектор, медиумите и меѓународните пријатели“, велат од ДУИ.

ДПА ја поздрави одлуката од Самитот на НАТО во Брисел за добивањето покана за членство на земјата во евро-атлантските структури.

„Имплементацијата на Договорот за името со Грција, што подразбира реализација на преземените обврски, останува и натаму услов за членство на земјата во НАТО и ДПА заедно со другите фактори ќе се ангажира максимално со цел овој процес да заврши успешно“, порачува ДПА.

Иако беше тежок процес, со многу перипетии и жртви, а и можност која што ја пропуштивме во 2008 година, денес стана реалност, се велат од крилото на Движење Беса на Африм Гаши.

„Секако дека за ова се заслужни сите граѓани на Македонија и тие заслужуваат најголеми честитки, но и политичките актери од земјава ја завршија својата работа, вклучувајќи ја тука и активноста на Движење Беса, нешто што го потврди со приклучувањето кон оваа влада“, велат од Беса на Гаши.

Но, од опозициската ВМРО-ДПМНЕ велат дека поканата за НАТО е условена поради неспособноста на власта, затоа најавуваат протести во недела во Кавадарци.

Партиите на власт се убедени дека граѓаните ќе го поддржат овој процес на референдумот кој треба да се одржи на есен. Меѓутоа, опозициската партија инсистира граѓаните да гласаат на референдумот против промената на името и бараат безусловно членство во НАТО.