Kreu i grupit militant libanez Hezbollah tha të premten se organizata e tij ruan të drejtën për t’iu përgjigjur vrasjes së komandantit të vet kryesor ushtarak disa ditë më parë nga Izraeli dhe la të hapur mundësinë e një konflikti të ri me Izraelin.
Naim Qassem foli në një transmetim televiziv ndërsa frika po rritej në Liban se Izraeli mund të përshkallëzojë bombardimet e tij mbi vendin për ta detyruar Hezbollah-un të dorëzojë arsenalin e tij, gjë që grupi e ka refuzuar vazhdimisht.
Vrasja nga Izraeli e komandantit kryesor ushtarak të Hezbollah-ut, Haytham Ali Tabtabai, në një sulm mbi lagjet jugore të Bejrutit më 23 nëntor, e shtoi edhe më shumë këtë shqetësim.
Qassem tha se grupi do të “caktojë kohën” për çdo hakmarrje dhe se kërcënimet për një fushatë ajrore më të gjerë nuk kanë ndikim mbi ta, por se një luftë e re është e mundur.
“A prisni një luftë më vonë? Është e mundur ndonjëherë. Po, kjo mundësi ekziston, dhe ekziston edhe mundësia që të mos ketë luftë,” tha Qassem, citon Reuters.
Ai nuk e shprehu qartë se cili do të ishte pozicioni i grupit në një luftë të re, por tha se Libani duhet të përgatisë një plan për t’u përballur me Izraelin që mbështetet te “ushtria dhe populli i tij.”
Qassem shtoi gjithashtu se shpreson që vizita e ardhshme e Papës Leoni në Liban “të luajë një rol në sjelljen e paqes dhe në përfundimin e agresionit (izraelit).”
Libani është nën presion të shtuar si nga Izraeli ashtu edhe nga Shtetet e Bashkuara për të çarmatosur sa më shpejt Hezbollah-un dhe grupet e tjera militante në vend.
Menjëherë pas përfundimit të fjalimit të Qassem-it, zëdhënësi i ushtrisë izraelite, Avichay Adraee, tha se përpjekjet e ushtrisë libaneze për të sekuestruar armët e Hezbollah-ut në jug të vendit ishin “të pamjaftueshme.”
“Hezbollah vazhdon t’i manipulojë ata dhe të veprojë fshehurazi për të ruajtur arsenalin e tij,” tha Adraee në një postim në X.
Por Hezbollah ka deklaruar se nuk është i gatshëm të heqë dorë nga armët e tij për sa kohë që Izraeli vazhdon sulmet mbi territorin libanez dhe pushtimin e pesë pikave në jug të vendit.