STAGNOJNË INVESTIMET E HUAJA NË MAQEDONI, BIRN: “51 INVESTIME NGA 138 TË PARALAJMËRUARA”

1599
0
SHPËRNDAJE

Nga 138 investimet e promovuar prej Qeverisë në dekadën e fundit, sipas hulumtimit të rrjetit BIRN, vetëm 51 investime të huaja janë realizuar. Kjo tregon se madje 43 investime të huaja të paralajmëruara fare nuk janë realizuar ose të njëjtat kanë dështuar, dhe 44 investime tjera janë në proces e sipër.

Nga 3,79 miliard euro vlerë investimesh që ishte parashikuar, sipas këtij hulumtimin janë investuar vetëm gjysmë miliard euro. Kurse, nga 62,700 vende të reja të punës, vetëm 20.250 janë punësuar.

Eksperti për çështje ekonomike, Abdulmenaf Bexheti, thotë se prurjet e parave nga diaspora dhe transferimet private janë dyfishi i parave të investuar nga kompanitë e huaja, të cilat nuk i përmbahen marrëveshjeve me shtetin.

“Ata investitorë me mos respektimin e marrëveshjeve tregojnë se nuk janë investime të qëndrueshme dhe qëllimi i tyre është që të shfrytëzojnë gjendjen momentale, masat lehtësuese dhe benefitet, duke mos i zbatuar marrëveshjet bazë. Nëse ata nuk i përmbahen marrëveshjes së zbatimit sipas dinamikës së parashikuar, çka mund të presim prej tyre diçka më tepër se sa janë marr vesh me shtetin”, tha Abdulmenaf Bexheti, ekspert i ekonomisë.

Ndihmë shtetërore si investitorë të huaj kanë marrë 26 kompani të jashtme, megjithatë sipas BIRN nuk dihet se sa është shuma e parave, me anë të të cilave është financuar hyrja e investitorëve të huaj në vend. Po ashtu, të dhënat që dolën nga hulumtimi i rrjetit BIRN, tregojnë se vetëm katër kompani të huaja që kanë investuar në Maqedoni, kanë investuar aq para sa kishin premtuar ose edhe më shumë.

“Fakti parë lidhet me situatën politike, krizë e cila është thelluar në dy vjetët e fundit. Gjatë kësaj periudhe nuk ka ndonjë investim të ri të rëndësishëm nga jashtë, por ajo që më pak vërehet në opinion është fakti që kemi realizim më dinamik të ulët nga kompanitë që tani kanë investuar këtu. Para së gjithash, investitorët e huaj duan stabilitet politik dhe sundim të së drejtës”, u shpreh Marjan Petreski, Profesor i ekonomisë.

Ndërkaq, të dhënat të fundit të Enti shtetëror të statistikës për vitin e kaluar, tregojnë se papunësia në Maqedoni është ulur në 23,1%, për dallim nga viti 2015, që ishte 26,1%. Sipas Enti Shtetëror të Statistikës numri i përgjithshëm i shoqërisë aktive për punë është 950 mijë persona, nga të cilët 731 mijë janë të punësuar, kurse 219 mijë ende janë papunë.

Përgatiti: Adnan Qaili

S'KA KOMENTE

PËRGJIGJU