0

Pas shumë akuzave nga ana e opozitës lidhur me propozim-tekstin e Planit të Qeverisë për rritje ekonomike, sot me qëndrim doli edhe zëvendëskryeministri i çështjeve ekonomike, Koço Angjushev. Ai nuk pajtohet me ish-zëvendësministrit të ekonomisë, Hristijan Delev, i cili në emisionin debativ “Klik Plus” të TV21, akuzoi se ligji i ardhshëm nga sfera e ekonomisë nuk është në përputhshmëri me madje 5 ligje të tjera ekzistuese. Angjushevi sot ishte kategorik – Ligji që duhet ta lëvizë ekonominë përpara është zgjidhja më e mirë, sesa atë që e zbatonte pushteti i kaluar.

“Ky ligj nuk është në kundërshtim me asnjë ligj në Maqedoni. Absolutisht, ligji është kompatibil me të gjitha ligjet ekzistuese në Maqedoni. Këtë ligj është më i mirë, sesa të sillet kontrata për 23 kompani në seanca të mbyllura të Qeverisë”, u shpreh Koço Angjushev, zëvendëskryeministër i çështjeve ekonomike.

Qëndrimi i opozitës është se masat në planin qeveritar do të shkaktojnë pasoja katastrofale mbi ekonominë e Maqedonisë. Delevi, pohon se ky ligj është në kundërshtim me Ligjin për zonat Teknologjike Zhvillimore Industriale, Ligjin për punësim dhe Ligjin për ndihmë shtetërore.

“Këtë ligj nuk e ka parë asnjë jurist, sepse kjo nuk mund të jetë ligj. Për gjysmë ore gjeta 100 gabime dhe ka 100 arsye përse ligji nuk duhet miratuar. Ai do t’u sjellë katastrofë enorme biznesit dhe ekonomisë së Maqedonisë. Nëse emërohet si “Plan i Qeverisë”, mirë është, por në asnjë mënyrë nuk mund të jetë ligj, sepse është në kundërshtim me 5 ligjet e tjera”, u shpreh Hristijan Delev, Ish-Ministër i Ekonomisë.

Një nga akuzat më serioze lidhur me propozim-planin për rritje ekonomike, vjen nga afaristi Goran Rafajlovski. Sipas tij, masat kryesisht janë të dedikuara për “lojtarët e mëdhenj”. Ai konsideron se  kompanitë e mesme dhe të vogla janë përjashtuar, të cilat janë madje 90% të ekonomisë maqedonase.

“Së pari keni elemente antikushtetuese dhe ndarje për atë se kush mund të përdorë ndihmë, e kush jo. Së dyti-ligji në masë të madhe i përkrah biznesmenët e mëdhenj dhe biznesin e madh. Çdo vend bazohet në ndërmarrje të mesme, të cilat duan të rriten. Tani ato po anulohen, sikur të mos ekzistojnë”, tha Goran Rafajlovski, afarist.

Angjushev mbetet në qëndrim se edhe kompanitë e vogla dhe ato të mesme do të marrin ndihmë adekuate shtetërore. Kusht për këtë është që pronarët ta mos reduktojnë numrin e të punësuarve në nivel vjetor dhe të mos shkojnë në minus, sa u takon rezultateve që i tregon kompania e caktuar. Ndryshe, planin për rritje ekonomike, i cili duhet të jetë zgjidhje ligjore, sipas paralajmërimeve, deputetët duhet ta miratojnë më së voni deri në fund të këtij muaji, që do të thotë se akoma ka kohë për përpunimin e tij. Masat që i përmban ky plan, sipas pushtetit, do ta lëvizin ekonominë përpara, duke parashikuar kështu rritje të BPV-së prej 3.2% në fund të këtij viti. Me masat që rrjedhin nga ky plan, është parashikuar të shpenzohen 50 milionë euro para të popullit.

Përgatiti: Ile Petrevski

0

Pas debateve tashmë disa ditore për parregullsi në ndarjen e fondeve për shoqata dhe artistë, nga Ministria e Kulturës për TV21 sot foli këshilltari Petrit Saraçini. Sipas tij, asnjë denar nga Ministria e Kulturës nuk i është paguar askujt. Për projektet e aprovuara ose të refuzuara po përgatiten vendimet për të cilat aplikuesit kanë afat prej 15 ditësh për t’u ankuar, tha Saraçini, duke shtuar se pas kësaj procedure, projektet fituese do të nënshkruajnë kontratë me Ministrinë e Kulturës, e cila fillimisht do t’u ndajë fituesve 1 të 3-tën e fondeve ndërsa 70% do t’u jepet pas dorëzimit të raportit për punën e bërë nga ana e shoqatës fituese. Sipas këshilltarit të Ministrisë së Kulturës, të gjitha hamendjet për keqpërdorime do të qartësohen në vijim, madje kjo do të bëhet edhe me ndihmën e Komisionit për Antikorrupsion, tha Saraçini. “Ministria për të gjitha rastet kur kemi indicie, apo opinion na ka dhënë indicie se diçka nuk është në rregull, lidhur me nepotizmin, korrupsionin, klientelizmin e dukuri të tilla, ne do të kërkojmë vlerësim zyrtar prej komisionit për parandalimin e korrupsionit. Ai është trupi valid në këtë shtet i cili mund të përcaktojë në mënyrë ligjore, vallë ka pasur apo nuk ka pasur konflikt interesash”, tha Petrit Saraçini, Këshilltar në Ministrinë e Kulturës.

0

Zhan Klod Junker të dielën do të mbërrijë në Shkup. Njeriu i parë i Komisionit Evropian në Maqedoni do të qëndrojë vetëm disa orë, brifojnë burimet diplomatike për TV21. Ai do të takohet me kryeministrin Zoran Zaev, kurse akoma nuk është konfirmuar nëse Junkeri do të realizojë takim edhe me faktorët e tjerë politik në vend. Zaevi dhe Junkeri do të mbajnë një konferencë të përbashkët për shtyp, në të cilën do t’i prezantojnë konkluzionet nga takimi, kurse pritet kryetari i Parlamentit Evropian të dërgojë mesazhe inkurajuese lidhur me përparimin e vendit drejt rrugës euro-atlantike.

Disa ditë më vonë, sipas paralajmërimeve, në Shkup do të arrijë shefi i diplomacisë greke, Nikos Koxias. Pritet që Koxias me vete ta sjellë edhe projekt-dokumentin, të cilin, tashmë një periudhë më të gjatë paralajmëron se do t’ua dorëzojë Zaevit dhe Dimitrovin. Para disa ditëve, Koxiasi në një intervistë për televizionin grek “Alfa”, deklaroi se dokumenti do të përbëhet nga njëzet faqe, kurse i njëjti ka të bëjë me emrin, vëllimin e përdorimit, identitetin, kombësinë dhe gjuhën. Ai tha se qëndrimi i Athinës është emër i shkruar në gjuhë sllave dhe pa përkthim, por Zaevi dëshiron që emri të jetë i shkruar me alfabetin latin dhe të përkthehet në të gjitha gjuhët.

“Shembull i tillë janë Nova Makedonija, Gorna Makedonija ose Vardarska Makedonija. Kemi diskutime. Mendoj se shkupjanët dëshirojnë një emër të shkruar në alfabetin latin, të jetë në gjuhën angleze, prej së cilës pastaj do të përkthehet në të gjitha gjuhët e tjera. Dëshira ime është pak më komplekse. Do të doja emër i cili tregon qartë se kjo është një Maqedoni tjetër, entitet gjeografik, ndërsa jo trashëgimia historike e Maqedonisë greke”, u shpreh Nikos Koxias, Ministër i Punëve të Jashtme të Greqisë.

Kryeministri Zaev, në intervistë për Radion shtetërore austriake ORF, tha se është optimist se do të gjendet një zgjidhje për emrin, kurse nga ana tjetër është decid se për identitetin fare nuk do të bisedohet.

“Më vjen mirë që në shtatë pikat nuk është cekur tema – identiteti. Kjo është mirë, sepse identiteti është ndjenjë personale. Kjo çështje nuk mund të ndryshohet, as me votim në Parlament, e as me referendum”, u shpreh Zoran Zaev, kryeministër i RM-së.

Në intervistën, mes të tjerësh, Zaevi tha se është e mundur që të arrihet një zgjidhje për kontestin para Samitit të NATO-s në korrik, por në qoftë se kjo nuk ndodh, vendi do të marrë ftesë automatike nga Aleanca, e cila është aktuale qysh në vitin 2008.

Përgatiti: Antonio Kërstevski

0

Gazetares Ivona Talevska, e cila u akuzua për evazion fiskal, iu shqiptuar dënim me kusht prej dy viteve burg nëse në katër vitet e ardhshme nuk kryen ndonjë vepër penale. Procedura gjyqësore për këtë rast të Prokurorisë speciale përfundoi për një ditë, për shkak se Talevska e pranoi fajin ndërsa gjykatësja Sofija Llalliçiq, një orë më vonë ia shqiptoi dënimin dhe e obligoi që në afat prej një viti të kthejë tatimin në vlerë prej dy milionë denarë.

“E akuzuara Ivona Talevska në bazë të pranimit të fajit pajtohet se është fajtore dhe i caktohet masë alternative – dënim me kusht me 2 vite burg, dënim ky i cili nuk do të realizohet nëse në katër vitet e ardhshme nuk kryen vepër të re penale. Njëkohësisht obligohet që ta paguaj dënim prej 1.671.611 denarëve për evazion të tatimit personal si dhe 1.145.979 denarë për personin juridik ‘Smart’ ”, tha Sofija Llalliçiq, Gjykatëse – Gjykata Themelore Shkup1.

Për Prokurorinë Speciale, pranimi i fajit është vërtetim për akuzën e parashtruar. Pasi në formë të shkruar do ta marrin vendimin gjyqësor, do të vendosin se a do ta zbusin dënimin e shqiptuar.

“Ne jemi të kënaqur nga pranimi i fajit nga ana e të akuzuarës Ivona Talevska dhe përfaqësuesit të personit juridik i akuzuar në këtë rast, si dhe vendimi gjyqësor me të cilin gjykata i shpalli fajtorë për shkak se me këtë u tregua se akuza e parashtruar ka qenë e arsyeshme dhe e bazuar. Në lidhje me sanksionin penal të cilin e dëgjuam nga vendimi gjyqësor, do të presim që ta marrim vendimin në formë të shkruar dhe do të prononcohemi në mënyrë shtesë”, tha Elizabeta Josifovska, Prokurore e PPS-së.

As Talevska e as avokatët e saj nuk dhanë deklaratë për mediat. Paraprakisht të akuzuarit në seancën gjyqësore në fjalët përfundimtare theksuan se fajin e pranojnë me qëllim që të përfundojë linçimi i mediave të cilin tashmë një vit e ka duruar Talevska pas hetimit të PPS-së. Ky është vendimi i katërt gjyqësor për Prokurorinë Speciale pas dy vendimeve për rastin “Dhuna në Komunën Qendër” dhe një për rastin “Fortesa- Target”. Në aktakuzën për rastin “Tifani” është potencuar se Talevska për “nevojat e kompanive” ka blerë mobilje, biçikleta, dyer, tepihë, makijazh dhe veshje me qëllim që t‘u ikë obligimeve tatimore.

Përgatiti: Mihajllo Vidmiliski              

0

Drejtori i Institutit publik shëndetësor për përkujdesjen e fëmijëve me probleme edukativo-sociale dhe me sjellje të çrregulluar, Stevço Sokollovski, sot dorëzoi dorëheqje për shkak të arsyeve morale. Ministria për punë dhe politikë sociale vazhdon me hetimin e rastit.

Dorëheqja erdhi pasi një vajzë me iniciale R.I 13 vjeçare abortoi pasi mbeti shtatëzënë si pasojë e abuzimit seksual teksa ka qenë e strehuar në shtëpinë për përkujdesjen e fëmijëve “25 Maji”. Për këtë rast për herë të parë alarmoi “Qendra Evropiane për të Drejtat e Romëve”, ku kërkuan nga autoritetet përkatëse të shqyrtojnë rastin dhe t’i sigurojnë vajzës strehim të sigurt. Ndërsa babai i vajzës tregon se me vajzën u nda kur ajo i  kishte 5 vjet pasi iu mor e drejta prindore. Sipas babait, vajza ishte abuzuar seksualisht edhe në qytetin e Strugës, kur kishte qenë në pushimore në vitin 2016.

“E kanë dërguar në Strugë në një pushimore, dhe kur shkova ta marr unë me vërtetim vajza më tregoi se çfarë i ka ndodhur dhe se e kanë abuzuar seksualisht. Unë thirra policinë nga Matka dhe morën dëshmi nga unë dhe vajza ime. Kjo ka ndodhur në vitin 2016”, tha Shefket Ibrahimi.

Ndërsa nga “Qendra Evropiane për të Drejtat e Romëve”,  thonë se ky rast nuk është i vetëm por ka pasur edhe raste të tjera në këtë qendër strehimore për fëmijëve.

“QEDR ka pasur dëshmi të ngjashme  për dy motra rome të cilat gjithashtu janë pjesë e Shtëpisë për përkujdes të fëmijëve “25 Maji”, V.A. në moshën 16 vjeçare dhe L.A. në moshën 13 vjeçare. Edhe ata të dyja shpeshherë janë zhdukur nga shtëpia për përkujdes dhe në mënyrë të ngjashme. Zhdukjet e tyre nuk janë paraqitur në polici ose tek prindërit. Sipas dëshmive të tyre, një mashkull më i vjetër i cili është identifikuar si i punësuar në Qendrën për punë sociale, i ka marrë nga shtëpia e përkujdesit dhe i ka dërguar në stacionin e vjetër hekurudhor të Shkupit, ku dhe ka abuzuar seksualisht me ta”, nga Qendra Evropiane për të drejtat e Romëve.

Për rastin është njoftuar edhe Ministria e Punëve të Brendshme dhe Prokuroria themelore publike ku është kërkuar që të hetohet rasti dhe të kapet sulmuesi i fëmijëve. Ndërsa nga Ministria e punës dhe politikës sociale thonë se nga mesi i vitit 2018, do të fillojë transformimi i enteve për përkujdesjen e fëmijëve në rrjetin e shtëpive të vogla grupore për përkujdes. Kjo reformë do të mundësojë qasje individuale deri te çdo fëmijë, kujdes më të mirë dhe zvogëlim të rrezikut nga ngjarjet e tilla të padëshiruara.

Përgatiti: Afrim Jonuzi

0

Kryetari i Aleancës për Shqiptarët, Ziadin Sela, dha dëshminë e tij në cilësinë e të dëmtuarit për ngjarjet 27 prillit të vitit të kaluar. Sipas tij, 10 të akuzuarit që ndodheshin në gjykatë janë vetëm dorasit e një sulmi të ideuar paraprakisht. Ai kërkoi të investigohet se si për gjithçka tjetër ka pasur videoinçizime, përveç për sulmin ndaj tij.  Pas seancës në deklaratë për media Sela akuzoi strukturat e atëhershme të pushtetit për siç tha, organizimin me paramendim të sulmit ndaj tij. Shpjegim për mos-gjetjen e video materialeve kërkoi edhe nga qeveria e tanishme.

“Nuk janë vetëm ca individë dhe doras që kanë bërë sulmin, por ka një organizim të mirëfilltë të strukturave të shtetit të atëhershëm, të cilët kanë planifikuar me detaje gjithçka. Zaten edhe tendencat për t’u vjedhë inxhizimet prej parlamentit në mënyrë që të mos dalë asgjë, e dëshmojnë edhe një herë këtë që sapo thash…  Pjesa tjetër tani, që u gjetën inxhizimet dhe nuk u gjet asgjë në lidhje me sulmin që u bë më 27 prill, mua personalisht Ziadin Selës, ngelet që shpjegimet ti japë, edhe pushteti i tanishëm”, u shpreh Sela.

Sela njoftoi se nga Kuvendi e kanë nxjerrë të maskuar si polic të lënduar. Gjatë pyetjeve të prokurorit publik, ai shpjegoi se si ka ndodhur e gjithë ngjarja, duke theksuar se kur ka hyrë turma e njerëzve në sallën e Qendrës për shtyp, ai dhe një grup deputetësh ishin në një cep të sallës. Pasi është ndarë nga deputetët tjerë, i është vërsulur turma, duke bërtitur “Ja Sela, hajde te Sela.” Pastaj turma kanë filluar ta godasin në kokë dhe trup dhe në atë moment ka humbur vetëdijen, për t’u zgjuar më pas në dhomën 334 të Kuvendit, nga ku e kanë dërguar në klinikën shtetërore. Sela njoftoi se një gazetare e ka xhiruar të gjithë rastin. Madje sipas tij, në një moment gazetarja ka shkuar përtej detyrimit profesional, duke e penguar Selën të dalë nga salla.

“Pak para se të hyjë turma në sallë, unë dhe Surja Rashiti vendosëm të ngjitemi në zyrat tona, kur në derë na doli gazetarja dhe na tha “S’keni për të shkuar askund, tani e sheh se çfarë ju pret”. Më erdhi keq ta godas, meqë ishte femër dhe vendosëm që të kthehemi në pres qendër. Ajo ka qëndruar afër meje gjatë gjithë kohës dhe mendoj se ka xhiruar gjithçka”, shtoi Sela.

Për tentim-vrasje ndaj deputetit Ziadin Sela akuzohen 10 persona. Në mesin e tyre janë Caje dhe Kire Gjorgjievski, Andrej Micov, Stojan Pavlevski, Nikolla Vojminovski, Kosta Dellov, Alesandar Janevski, Sasho Senkov, Oliver Oshavkovski dhe Nikollçe Dimitrievski. Seanca e radhës është caktuar për nesër në ora 10.

Përgatiti: Bajram Memeti

0

Sipas shqyrtimit të propozim-ligjeve për ndjekje të komunikimeve dhe për Agjencinë Teknike Operative – OTA, është vlerësuar se këto dy propozim-ligje kanë mangësi të cilat rrezikojnë të mos japin rezultatet e pritura. Profesori Marjan Xhurovski theksoi se këto propozim-ligje duhet të ofrojnë efektivitet dhe efikasitet në sistemin e sigurisë në vend, ndërsa qasja e deritanishme drejt reformave  jep zgjidhje parciale, dhe jo vetëm, kjo qasje rrezikon të jetë në kundërshtim me udhëzimet e  BE-së.

“Në rendin juridik duhet të ekzistojnë vetëm norma të qarta dhe precize me të cilat duhet logjikisht të përcaktohet tërësia funksionale juridike, gjë që nuk ndodh me dispozitat e këtij propozim-ligji për ndjekje të komunikimeve, dhe me këtë hapet dyshimi për keqpërdorime të mundshme të të dhënave personale të cilat operatorët i mbledhin për personat fizik dhe juridik”, u shpreh Xhurovski.

Formimi i Agjencisë Teknike Operative e njohur si OTA, është një hap i rëndësishëm, dhe sipas profesorit Tome Batkovski, është me rëndësi që personat të cilët punojnë në shërbimet për siguri dhe kundërzbulim, të jenë shtetas ekskluzivisht vetëm të Maqedonisë për shkaqe sigurie.

“Çështja e punësimit është se në ligj qëndron se drejtori dhe të punësuarit tjerë duhet të jenë shtetas të Republikës së Maqedonisë, kjo është në rregull por duhet të theksohet se duhet të jenë shtetas vetëm të RM-së, sepse në këto shërbime në botë nuk lejohet dyshtetësia”, u shpreh Prof.Dr. Tome Batkovski, fakulteti i sigurisë, Shkup.

Por a ndjehen të sigurt qytetarët se me ardhjen e pushtetit të ri, ata më nuk përgjohen? Sipas anketës së Tv 21, vërehet një besim i shtuar ndaj kësaj qeverie për këtë çështje.

“Mua qeveria e kaluar më ka përgjuar 3 vite, tani jam duke kërkuar dëmshpërblim, ndërsa për këtë tani do të shohim por mirë është. Disa për të mëparshmet do të paguajnë, tani ta shohim për të tjerat. Do të formohet edhe agjencia e re dhe do të shohim se si ajo do të përgjojë apo jo.”

“Po, jam e sigurt.”

“Jam e sigurt se qeveria e re nuk do të më përgjojë. Nuk ka për çka të më përgjojë.”

“Mendoj që jo.”

“Të gjithë përgjojnë dhe kjo është fakt”, anketë me qytetarë.

Trajço Dimkov nga partia opozitare e VMRO-DPMNE-së, potencoi se vendimet për reforma janë të përshpejtuara dhe sipas tij, duhet më shumë kohë me qëllim që të sillen vendime ligjore më të mira.

Ligjet për reforma të sistemit për ndjekje duhet të miratohen në fazën e dytë në kuvend, ndërsa OTA është paraparë që të fillojë me punë në nëntor. MPB deri tani nuk ka informuar se sa do të jetë shuma e parave për reformat. Precizim të vendimeve ligjore për reforma në sistemin e ndjekjes, harmonizimin e tyre me standardet ndërkombëtare, mbrojtje të të dhënave personale të qytetarëve dhe departizim i shërbimit janë një pjesë e rekomandimeve të cilat dolën nga debati i dytë për propozim-ligjet për ndjekje të komunikimeve dhe formimin e OTA-s.

0

Vazhdojnë akuzat se kush është legjitime e kush nuk është legjitime në partinë Lëvizjes Besa.

Lëvizja Besa e Bilall Kasamit, thotë se do ta padisin pas kongresit, Lëvizjen Besa tani më të Afrim Gashit. Kjo parti thotë nuk ka dy kongrese po vetëm një kongres dhe zgjedhjen e Gashit, nuk e njohin.

“Paritë politike janë të regjistruara në Regjistrin e partive politike. Partitë politike mund të kenë vetëm një Kongres, pas përfundimit të të cilit, ne do ta dorëzojmë në gjykatë dokumentacionin e plotë nga Kongresi”, tha Avdush Demiri, zëdhënës i Lëvizjes Besa.

Një ditë më parë Lëvizja Besa, në Tetovë zgjodhi Afrim Gashin kryetar të kësaj partie. Ai tha se zgjedhja e tij është legjitime dhe nuk i intereson se si do të përfundojë beteja juridike me grupin tjetër i cili pretendon se e ka legjitimitetin dhe legalitetin.

“Ne jemi të preokupuar me procesin tonë. Ky proces i joni sot ka përfunduar. Ajo është një organizatë krejt tjetër. Beteja juridike do të zhvillohet dhe do të përfundojë ashtu siç do të vendosin gjykatat, por organizata është kjo. Kjo është ideja, këtu është koncepti, këtu janë njerëzit. Ne do të vazhdojmë, pavarësisht emrave që pranohen në gjykatë apo jo”, tha Afrim Gashi, kryetar i Lëvizjes Besa.

Situatën në të cilën po kalon Lëvizja Besa, Gashi dje e cilësoi si një grip sezonal, të cilin organizata po e tejkalon dhe po e forcon imunitetin politik. Përveç zgjedhjes së kryetarit, partia dje miratoi edhe statutin e ri të partisë, programin politik si dhe votoi anëtarët e Kuvendit Qendror, organe këto të cilat, janë tërësisht të papranuara për krahun e Besës së Kasamit.

Përgatiti: Zimer Jashari

0

Tash e 5 javë vazhdon bojkoti i nxënësve të Shkollës Fillore “Mustafa Kemal Ataturku” në fshatin Vërtekicë të Komunës së Studeniçanit.

Prindërit refuzojnë t’i dërgojnë fëmijët e tyre në shkollë për shkak të largimit nga puna të një mësuesi dhe krijimin e paraleleve të kombinuara, ku në një klasë të vetme mësojnë nxënës të klasës së parë dhe të dytë dhe në klasën tjetër, të klasës së katërt dhe të pestë. Klasë të tretë nuk ka.

“Nuk kemi ndonjë sqarim nga këto tre institucione për ta shqyrtuar këtë problem. Ne jemi të vendosur dhe bojkoti do të vazhdojë , deri sa ky problem nuk shqyrtohet. Kemi bërë kërkesa që paralelet mos të ndryshojnë, por të vazhdojnë ashtu siç ishin në fillim”, tha Abdurrahim Ademi, këshilli i prindërve.

Ministrja e Arsimit dhe Shkencës, Renata Deskoska, thotë se janë të informuar për problemin, dhe për këtë janë dërguar inspektorë në terren për të analizuar situatën e krijuar dhe për të marrë vendimin e duhur.

“Është dërguar shkresë deri tek Inspektorati Shtetëror i Arsimit, i cili tani më është në terren dhe do të japë vlerësim nëse bëhet fjalë për procedurë ligjore ose jo, duke marrë parasysh se tani bëhet fjalë për vazhdimin e vitit shkollor, dhe në bazë të saj ne do të veprojmë. Pra jemi të njoftuar për problemin dhe organet përkatëse janë në terren”, u shpreh Deskoska.Nga Komuna e Studençanit thonë se vendimi i tillë erdhi si rezultat i numrit te vogël të nxënësve në këtë shkollë. Prindërit vazhdojnë të jenë të revoltuar me këtë çakordim të paraleleve, duke thënë se kjo ndikon drejtpërdrejt në cilësinë e mësimit të fëmijëve të tyre.

Përgatiti: Zimer Jashari

0

Pronari i “Veibo grup” ka dy opsione, të sjellë kapital të ri dhe t’ua kthejë borxhin të gjithë kreditorëve dhe të vazhdojë të punojë apo, ndërkaq të shkojë në falimentim, porosit zëvendëskryeministri për Çështje Ekonomike Koço Angjushev.

“Në njërën apo në tjetrën mënyrë të punësuarit në Kriva Pallankë do t’i marrin pagat e tyre të prapambetura. Për fat të mirë është që në procedurën e falimentimit do të kishte më shumë kapital për shkyerje sesa që ka për obligime ndaj të gjithë kreditorëve përfshirë edhe të punësuarit të cilëve u ka borxh tri paga”, tha Angjushev në përgjigjen e pyetjes pas nënshkrimit të marrëveshjes për ndihmë shtetërore me kompaninë gjermane “VIK” në Qeveri.

Ai theksoi se sot në Qeveri ka pasur takim dyorësh me pronarin e “Veigo grup” ku ai është ankuar se nga Qeveria paraprake i është premtuar se në Maqedoni mund të gjejnë 2.000 punëtorë të cilët do të punojnë për pagë prej 150 eurove në muaj. Ata me Qeverinë e atëhershme kanë nënshkruar marrëveshje dhe kanë blerë truall me një sipërfaqe prej 400 mijë metra katrorë me qëllim që të bëjnë ZZHIT të tyren në Rankovcë, të dedikuar vetëm për tekstil. Kur kanë parë se nuk kanë mundur të gjejnë punëtorë për këtë pagë dhe se Qeveria nuk do t’i mbështesë kompanitë të cilat ofrojnë pagë të tillë nuk e kanë zhvilluar zonën dhe kanë blerë kapacitet në Kriva Pallankë dhe kanë bërë prodhim si edhe çdo kompani tjetër në Maqedoni.