0

Sipas rezultateve të para jo zyrtare, Gjevgjelia i dha një JO të madhe hapjes së minierës në rajonin e kësaj komune.

Për kanë votuar 154. Kundër 13097 apo 98%. Të pavlefshme ishin 133. Të drejtë vote kishin 19,459 qytetarë, në 37 vendvotime. Dalja e sotme në votime ishte 13.384 votues ose 68%.

0

Igor Petreski ëshë një djalosh 13 vjeçar nga Pripeli, i cili është i lindur me këtë sëmundje. Ai adhuron të luajë futboll, por për shkak të sëmundjes këtë e bën shumë rrallë. Federata e Futbollit të Maqedonisë para pak kohe e shënoi ditën botërore të Hemofilisë dhe u mundësoi personave me hemofili që ta ndjekin ndeshjen mes Maqedonisë dhe Lihtenshtajnit për moshat e reja deri më 16 vjet. Pjesë e këtij organizimi ishte edhe Igori.

Nëna e tij, Verica Petreska me sy të përlotur tregoi për dashurinë e tij ndaj futbollit dhe shtoi se djali i saj nuk ka probleme të mëdha me Hemofilinë, për shkak të terapisë cilësore.

“Kohë pas kohe ka gjakderdhje, por nuk janë shumë serioze, pasi që barnat janë shumë cilësore. Nganjëherë luan edhe futboll, por mjekët nuk i lejojnë që të luajë shpesh. Kjo është shumë tragjike. Shumë e don futbollin. Një herë më parashtroi një pyetje, për të cilën nuk dija se si të përgjigjem. Unë i them se kur të duash diçka, duhet të jesh këmbëngulës për ta arritur atë. Ai më tha unë dëshiroj të bëhem futbollist, por nuk mundem. Si të jem këmbëngulës?”, tha ajo.

Mjekja Zorica Trajkova – Antevska vlerëson së nevojitet edukim i madh për njerëzit me Hemofili, që ata ta pranojnë më lehtë problemin me të cilin përballen.

“Qëllimi kryesor është që të mbahet statusi normal i moshës. I shoh fëmijët, që nga lindja e tyre deri në moshën 18 vjeçare. Ne duhet ta diagnostikojmë sëmundjen, ta ndjekim rritjen dhe zhvillimin e fëmijëve, me qëllim që të rriten si persona që do të funksionojnë në mënyrë normale. T’i vetëdisojmë, t’i edukojmë që të jenë të pavarur sa i përket problemit me të cilin luftojnë që nga lindja”, u shpreh ajo.

Kryetarja e Shoqatës për Hemofili në Maqedoni, Lile Rajçevska theksoi se shumë njerëz e fshehin faktin se vuajnë nga Hemofilia. Sipas saj, disa prej tyre përballen me probleme serioze në jetë.

“Rreth 50 përqind e fshehin faktin se vuajnë nga Hemofilia dhe nuk duan të flasin në publik për këtë gjë. Nganjëherë ndodh që të mos ketë mjaftueshëm barna. Na duhet një buxhet i veçantë, që të bëhen operacione ortopedike te njerëzit me invaliditet, vetëm për shkak se nuk janë trajtuar me kohë. Disa prej tyre përballen me probleme që nga mosha e re në çerdhe dhe në shkollë. Të rriturit kanë probleme në punë sepse kanë nevojë që shpesh herë të dalin nga puna, ndërsa punëdhënësit nuk ua lejojnë një gjë të tillë”, tha Rajçevska.

Në Maqedoni janë regjistruar rreth 300 persona me këtë lloj sëmundje të rrallë, prej të cilëve 170 janë me mungesë Fonvilebrande dhe 24 prej tyre me koagulime të rralla. Në botë ka rreth 100 mijë njerëz që vuajnë nga Hemofilia. Kjo sëmundje më së shpeshti është trashëguese nga gjenet e prindërve. Hemofilia është problem i gjakderdhjes. Personat me hemofili. Këtyre personave u mungon faktori i koagulimit, protein ky që ndodhet në gjak, funksioni i të cilit është kontrollimi i gjakderdhjes.

0

Nuk ekziston “Platformë e Tiranës” e as ndonjë “Platformë e huaj” thonë socialdemokratët. I vetmi dokument që shpjegon punën e qeverisë që po pretendon ta formojë Zoran Zaev është programi qeveritar që e shpalosi një muaj më parë.

“Për momentin ekziston vetëm Programi për qeverinë e re të Maqedonisë, i cili është i hapur për popullatën. Ai është dokumenti i vetëm i cili për momentin përflitet në popull, dhe i njëjti ka të bëj kryesisht me formimin e qeverisë së re”, tha Dejan Pavlevski nga LSDM.

Por VMRO-DPMNE-ja e Nikolla Gruevskit insiston në origjinën e Deklaratës së përbashkët të partive politike shqiptare, duke thënë se e njëjta është nënshkruar dhe hartuar nga kryeministri shqiptar Edi Rama. Të pyetur nga TV21, nëse posedojnë fakte për këtë që e thanë, deputeti i VMRO-DPMNE-së Dragan Danev, tha se është gjë që shihet, duke mos treguar asnjë fakt.

“E gjithë popullata e Maqedonisë e pa ashiqare se “Platforma” ka qenë e hartuar nga Edi Rama sepse kjo marrëveshje u arrit në kabinetin e Edi Ramës në Tiranë“, tha ai. 

Deklaratat e Lëvizjes Besa në lidhje me origjinën e Deklaratës së përbashkët janë komentuar jo rrallë nga VMRO-DPMNE. Por Lëviz Besa thotë se Deklarata është hartuar në Shkup, ndërsa kryeministri shqiptar Edi Rama ka qenë vetëm lehtësues i këtij procesi.

“Deklaratat e VMRO-së nuk duhet marre seriozisht, ata nga halli se do përballen me drejtësinë janë në gjendje të trillojnë e të shpikin edhe të paqena tjera. Disa herë e kemi thënë publikisht se Deklarata e përbashkët e partive politike shqiptare në Maqedoni rrjedh nga platformat e tyre politike, ndërsa Kryeministri Edi Rama ka qenë vetëm lehtësues i këtij procesi.”

Deklarata e përbashkët e partive politike shqiptare në Maqedoni është nënshkruar nga partia e BDI-së , dhe koalicionet “Aleanca për Shqiptarët” e “Rilindja me Besë”. PDSH asnjëherë nuk e ka përshëndetur iniciativën për këtë Deklaratë, duke cilësuar të njëjtën si dokument sllavo-rus. Takimet mes liderëve shqiptar për unifikimin e Deklaratës së përbashkët ndodhën në fund të dhjetorit të vitit të kaluar. E për herë të parë pikat e Deklaratës u bën publike më 7 janar të këtij viti. Edhe pse akuzohet se ka hartuar të ashtuquajturën “Platformë”, ditën e publikimit të Deklaratës, kryeministri shqiptarë Edi Rama përshëndeti iniciativën e partive shqiptare në Maqedoni, duke e quajtur këtë si “Hap historik”.

Përgatiti: Besian Leka

0

Çelja e luleve dhe temperaturat e jostabile shqetësojnë personat me alergji më të shpeshta nga poleni. Ndezja dhe skuqja e syve, teshtitje, kollitje janë ndër simptomat më të shpeshta të cilët u paraqiten qytetarëve në këtë periudhë të vitit.

“Po kam alergji. Nga poleni dhe lulet më shumë. Kjo ndodh gjatë kohës së pranverës. E më shumë alergji kam kur çelin plepat kanadiane”

“Moti po ndikon shumë tek unë. Teshtij shpesh gjatë kësaj periudhe. Po edhe kollitem ndonjëherë. Pra koha po ndikon shumë”, u shprehën qytetarët.

Nga Klinika për Fëmijë njoftojnë se alergjitë e pranverës prekin më së shumti fëmijët. Rreth 90 kontrolle në ditë u regjistruan gjatë 3 ditëve të fundit, theksoi drejtoresha e Klinikës për Fëmijë, Aspazija Sofijanova. Ajo thotë se numri i fëmijëve me simptoma të alergjisë, gjatë këtyre ditëve është rritur dyfish.

“Në këtë kohë, me mot të ndryshueshëm, menjëherë po vërehet edhe trendi i ardhjes së fëmijëve. Duke pasur parasysh edhe temperaturat e rëna menjëherë, tek ata që kanë predispozita për alergji, kjo kohë i stimulon më shumë dhe pastaj  manifestohet me kollitje, me rrjedhje të sekretit të hundës dhe me skuqje  të syve”, tha ajo.

Nga kjo Klinikë presin që ky numër i fëmijëve të rritet gjatë ditëve të ardhshme shkaku që moti do të jetë me temperatura të ulëta. Ndërsa të njëjtit rekomandojnë për  personat që kanë predispozita për alergji, të qëndrojnë në shtëpi dhe mos të dalin pa nevojë derisa të ngrohet koha.

Përgatiti: Sabina Lazumova

0

Për të ndjekur mësimin në gjuhën e tij amtare, Bekim Zeqiri nga Jabollçishta e Epërme e Velesit ka ardhur në Shkup. Ai po ndjek mësimin në gjimnazin “Zef Lush Marku”, e për këtë u detyrua pasi që në gjimnazin “Koço Racin” në Veles nuk ka profesorë shqiptarë. Bekimi thotë se nuk e ka lehtë për të përballuar shpenzimet, për konvikt dhe për udhëtimet dy herë në muaj për në vendlindje.

 

“Ka shpenzime, por kur marrim parasysh më mirë është në shqip dhe të shpenzojmë, se sa me mësuar maqedonisht. Kjo është arsyeja se nuk dua të mësoj maqedonisht. Nuk jam vetëm unë, ka edhe shumë shok të tjerë që kanë ardhur këtu dhe në qytete tjera shqiptare ku mësohet vetëm shqip”, tha ai.

Sipas tij, shumë bashkëmoshatarë të tij që kanë ngelur të ndjekin mësimet në gjimnazin e Velesit po e humbasin gjuhën amtare, ndërsa maqedonishtja po përdoret si gjuhë komunikimi mes tyre.

“Atyre iu vjen më vështirë të mësojnë në gjuhën maqedonase. Ka raste që ngatërrojnë në gjuhën maqedonase, aq shumë që janë asimiluar në gjuhën maqedonase”, tha ai.

Sociologu Ali Pajaziti thotë se kjo dukuri e nxënësve shqiptar që mësojnë në gjuhën jo amtare duhet alarmuar, me që sipas Konventës Ndërkombëtare shkelet drejta për arsimim në gjuhën amtare. Pajaziti thotë se mungesa e kuadrit shqiptar në rajonin e Velesit është për shkaqe institucionale.

“Duhet që të gjithë të jemi më vigjilent në këtë drejtim dhe atyre fëmijëve tua sigurojmë këtë mundësi, me qëllim që të ruajmë indin tonë kombëtarë. Me të vërtetë paraqesin periferitë e shqiptarizmit për momentin. Por institucionet, gjegjësisht Qeveria e posaçërisht pjesëtarët shqiptarë të Qeverisë, partitë politike dhe gjithë opinioni publik, duhet të jenë më të zgjuar që këtë çështje ta alarmojnë”, theksoi Pajaziti.

Nxënësve të shkollës së mesme “Koço Racin” në Veles mbi 90 për qind të lëndëve u ligjërojnë profesorë maqedonas. Drejtoria e shkollës thotë se përgjigja duhet kërkuar tek komuna e Velesit, por kryetari i kësaj komune Sllavço Çadiev në prononcimin një muaj më parë për TV21 kishte deklaruar se përgjegjës për këtë situatë është Ministria e Arsimit, dhe se duhet të gjejë zgjidhje. E nga Ministria e Arsimit thonë se ky problem do gjejë zgjidhje pas formimit të Qeverisë.

Përgatiti: Miradie Hasani

0

Palmat të cilat para 3 viteve u mbollën në disa qytete nëpër Maqedoni, pothuajse të gjitha janë tharë. Edhe pse gjatë stinës së dimrit palmat u mbuluan me najlon, nuk arritën ta përballojnë dimrin. Drejtori i Pyjeve të Maqedonisë, Zharko Karaxhovski para disa viteve deklaroi se palmat mund të durojnë deri në -20 gradë, por nuk doli ashtu pasi që ato u ngrinë. Sipas tij, nuk është ai përgjegjës për atë se palmat janë tharë dhe shton se përgjegjës për mirëmbajtjen e tyre janë gjitha komunat në të cilat janë mbjellë palmat.

“Ndoshta palmat janë marrë të mira, gjithçka në rregull, edhe janë mbjellë mirë, ka filluar të vegjetojë, por tani  nëse askush nuk e mirëmban dhe nuk kujdeset për të gjatë sezonit të dimrit, ajo nuk është detyrë as e Pyjeve të Maqedonisë e as e shtetit, por detyrë e atyre qe duhet ti mirëmbajnë”, tha ai.

Nga qyteti i Shkupit topin e hedhin tek Pyjet e Maqedonisë.  Kryetari i Qytetit të Shkupit, Koce Trajanovski thotë se nuk mund të veprohet kundër natyrës, duke thënë se kemi pasur një dimër shumë të ftohtë.

“Janë marrë të gjitha masat e duhura nga ana e ekspertëve, në aspektin e ruajtjes së palmave gjatë sezonit të dimrit. Megjithatë, nganjëherë nuk mundemi kundër natyrës”, tha Trajanovski.

Janë mbjellë gjithsej 1500 palma për të cilat nga buxheti i shtetit u ndanë gjithsej 17 milion denarë. Palmat të cilat u ushqyen me humus dhe me mbeturina nga krimbat kalifornez  , u mbollën në Strugë, Ohër, Gjevgjeli, Dojran, Veles, Prilep, Resnje dhe Shkup, ndërsa se bashku me to u blenë dhe dushe dhe spërkatës të ujit për mirëmbajtjen e tyre.

Dimri i ftohtë bëri që palmat në disa qytete të Maqedonisë të thahen. Për palmat vetëm në Shkup janë shpenzuar gjysmë milion euro.

Një palmë kushtonte 500 euro, ndërsa askush nuk tregon se sa është paguar deri më tani për mirëmbajtjen e tyre. Në Shkup janë mbjellë 50 palma, ndërsa është planifikuar të mbjellën edhe 150 palma tjera. Qyteti i Prilepit  është qyteti i vetëm në të cilin gjatë dimrit mbijetuan të gjitha palmat. Karaxhovski thotë se deri në fund të muajit prill do të dihet numri i plotë i palmave të thara.

Përgatiti: Arbana Qerimi

0

Nga  fundi  i qershorit, ekipi i Katica Janevës nuk mund të ngrit aktakuza, pasi që skadon afati ligjor prej 18 muajve nga dita e marrjes së materialeve të përgjimeve. Më 30 dhjetor të vitit 2015, kësaj prokurorie iu dorëzuan të gjitha materialet, ndërkohë deri tani janë hapur 14 procese hetimore dhe 3 aktakuza.

Prokurorja Speciale, Katica Janeva kërkoi vazhdimin e mandatit të hetimeve, por gjithçka do të varet në Kuvend, pasi që për këtë duhen dy të tretat e votave.

“Bashkërisht të gjejmë zgjidhje adekuate ligjore e cila do të mundësonte që deri në fund t’i hetojmë veprat penale që janë nën kompetencën tonë, me qëllim që të realizohet mandati dhe misioni i kësaj prokurorie publike”, tha Janeva.

Por, sipas avokatit Valentin Zafirov kjo vështirë të përkrahet, pasi që sipas tij, politikanët kanë pranuar të themelohet kjo prokurori, por tani po përpiqen ta shpëtojnë jetën e tyre. Ai shton se është pozitiv fakti se një pjesë e madhe e gjykatësve kanë filluar të çlirohen nga prangat e sistemit.

“Ata gjykatës që po heshtin, janë pikërisht ata që kanë frikë, ndërsa zakonisht këta janë gjykatës mesatarë që janë bashkëkryerës të krimit në pushtetin ekzekutiv”, tha ai.

Sipas tij, edhe akuzat e reja që deri tani janë hapur nuk kanë pasur epilog gjyqësor.

Në këtë përbërje parlamentare po mungojnë votat për të votuar vazhdimin e mandatit të hetimeve, për shkak të kundërshtimeve nga VMRO-DPMNE.  Partitë e tjera politike parlamentare që janë për vazhdimin e mandatit kanë theksuar se fillimisht duhet të zgjidhet kryetari i Kuvendit dhe më pas të shqyrtohen opsionet për të konfirmuar fatin e PPS, rreth ngritjes së akuzave të reja.

Me PPS po merren edhe gjykatat e larta të vendit.  Gjykata Supreme javën e kaluar anuloi seancën, në të cilën pritej të vendoset për ligjshmërinë e Prokurorisë Speciale Publike dhe përdorimit apo jo të “bombave” si dëshmi hetimore. Ndërsa, në Gjykatën Kushtetuese janë në pritje iniciativat për ligjin për PPS-në, të cilat tanimë  më shumë se një vit e gjysmë nuk janë vendosur në rend të ditës. Ligjin për këtë prokurori e konteston kryetari i Kongresit Botëror Maqedonas, Todor Petrovi dhe  Tome Todorovski avokat nga Sveti Nikolla. Ndërkohë, ende mbetet e paqartë pas 30 qershorit të këtij viti se si do të veprojë kjo prokurori, për ngritjen e akuzave për lëndë të tjera të paralajmëruara siç janë “Monstra”, “Sopoti” , “Lagja e Trimave” dhe raste të tjera.

Përgatiti: Arbana Qerimi

0

Arrestohen për mbajtje dhe përpunim të drogës

Dy të rinj shqiptarë janë vënë në pranga dje nga policia italiane në Savio të Italisë.  Siç  shkruajnë mediet italiane, dy të rinjtë janë kapur në befasi nga policia.

Gjatë aksionit, policia u gjeti atyre një laborator të vogël të përpunimi dhe përgatitjes së drogës. Në pranga janë vendosur shqiptarët me inicialet X. L., 22 vjeç dhe B. R., 29 vjeç.

Atyre u është gjetur edhe një sasi prej 50 gramësh kokainë e pastër, e prerë dhe e bërë gati për tu përzier dhe më pas që të shitej në doza të veçanta.

Gjithashtu atyre u janë gjetur edhe 1mijë e 500 euro. Pas arrestimit janë dërguar në burgun e Ravenas.

0

Rrustemi ishte pjesë e organizatës demokratike “Bashkimi”

Avni Rustemi vdiq pas një atentati që iu bë në Tiranë. Atij i bëhet atentat më 20 prill pranë Pazarit të Ri por, vdes dy ditë më vonë, më 22 prill 1924.

Avni Rustemi lindi në Libohovë, në një familje atdhetare. I ati ishte Qehaja i familjes së Arsllan-Pashalinjve, oxhakut të Libohovës.

Mësimet e para i mori në vendlindje, më pas vazhdoi Normalen e Elbasanit dhe pastaj kolegjin e Shën Mitër Korone në Itali, kurse studimet e larta për pedagogji i filloi në Universitetin e Romës.

Më 1908 braktisi bankat e shkollës për t’u bashkuar me çetën e Çerçiz Topullit. Më 1910 tentoi për të vrarë në Shkodër komandantin e ekspeditës ushtarake osmane, gjeneral Shefqet Turgut pashën. Më 1914 u radhit në forcat shqiptare për çlirimin e Shqipërisë së Jugut nga pushtimi i forcave greke.

Gjatë veprimtarisë së tij, më 1910, ai punoi si mësues në Libohovë, në Tragjas të Vlorës më 1913, dhe në Tepelenë e në Vlorë në vitet 1916-1918. Më 1918 me nismën e tij, u formua në Vlorë shoqëria atdhetare e rinisë vlonjate me emrin “Djalëria e Vlorës” dhe në krye të saj organizoi demonstratën e 28 nëntorit 1918 kundër pushtuesve italianë.

Në pranverë të vitit 1919 në Shën Mitër krijoi “Lidhjen e Rinisë Shqiptare”, për mbrojtjen e të drejtave kombëtare kurse më 13 qershor 1920 vrau me atentat në Paris, Esat Pashë Toptanin.

Me rikthimin e Avni Rustemit në Shqipëri, veprimtaria e tij politike vjen duke u intensifikuar. Pikërisht, më dhjetor 1920 ai filloi punën për bashkimin e shoqërive demokratike ekzistuese në një organizatë të vetme. Kongresi i mbajtur më 25 prill 1921 në Vlorë krijoi një shoqëri, që mori emrin federata “Atdheu”. Kryetar nderi i saj u zgjodh Avni Rustemi.

Me nismën e tij u krijuan dhe organizata profesionale të mësuesve. Pas mbylljes së federatës “Atdheu”, në gusht 1922, përsëri me nismën e Avni Rustemit, më 13 tetor 1922 u krijua në Tiranë shoqëria demokratike “Bashkimi”.

Avni Rustemi, nuk qe vetëm organizatori kryesor i shoqërive demokratike, por edhe një ndër ideologët më të shquar demokratë. Daljen e vendit nga prapambetja, Avni Rustemi e shikonte në zhvillimin e ekonomisë së pavarur kombëtare. “Pa pavarësi ekonomike, – shkruan ai, – nuk mund të ketë pavarësi politike”.

Idetë e tij demokratike e revolucionare ai i shprehu edhe në Asamblenë Kushtetuese të vitit 1924, ku u zgjodh deputet nga populli i ish-prefekturës së Kosovës. Ai kritikoi me guxim shpërdorimet e aparatit burokratik të kohës, fodullëkun e injorancën e klasave sunduese reaksionare dhe mbrojti me zjarr traditat e popullit tonë dhe të drejtat e shqiptarëve që jetonin në trojet e veta në Jugosllavi.

Në kushtet e ashpërsimit të kontradiktave klasore e politike të vendit nga njerëz të vënë prej qeverisë së asaj kohe, atij i bëhet atentat më 20 prill 1924 pranë Pazarit të Ri në Tiranë, ku vdes 2 ditë më vonë pikërisht më 22 prill 1924. Vrasja e deputetit shërbeu si shkëndijë e Lëvizjes, që triumfoi më 10 qershor 1924.

Në këtë foto, ai shihet i torturuar barbaishtë nga policia franceze pasi kishte kryer atentat ndaj Esat Pashë Toptanit në Paris. Megjithatë, Avni Rrustemi u lirua pas vetëm 6 muajve.