0

89-та церемонија на врачување на наградите “Оскар” ќе се одржи во Лос Анџелес вечерва. Стотици уметници ќе се соберат на едно место во очекување на најголемата награда во филмската индустрија. Водител ќе биде популарниот ТВ водител и комичар, Џими Кимел.

Аналитичарите предвидуваат оваа церемонија да е најполитизираната во историјата на наградите на Американската филмска академија. Се очекува најмногу статуетки да грабне мјузиклот “Ла Ла Ленд”, кој има цели 14 номинации.

Настанот во живо ќе можат да го гледаат жителите на 225 земји од целиот свет.

Еве и кои се номинираните:

Најдобар филм

“Прв контакт” (Arrival); “Прегради” (Fences); “Приговор по совест” (Hacksaw Ridge); “По секоја цена” (Hell or High Water); “Скриени броеви” (Hidden Figures);”Ла Ла Ленд”;”Лав” (Lion); “Манчестер крај морето” (Manchester by the Sea); “Месечева светлина” (Moonlight).

Најдобар режисер

Денис Вилнев “Пристигнување”; Мел Гибсон, “Приговор по совест”; Демијан Чазел, “Ла Ла Ленд”; Кенет Лонерган, “Манчестер од морето”; Бари Џенкинс, “Месечева светлина”.

Најдобар актер

Кејси Афлек, “Манчестер од морето” ; Ендру Гарфилд, “Приговор по совест”; Рајан Гослинг, “Ла Ла Ленд” ; Виго Мортенсен, “Капетан фантастика”; Дензел Вашингтон, “Прегради”.

Најдобра актерка

Изабел Јупер “Таа”; Рут Нега “Сака”; Натали Портман, “Џеки”; Ема Стоун, “Ла Ла Ленд”; Мерил Стрип, “Фиренца Фостер Џенкинс”

Најдобар спореден актер

Махершала Али, “Месечината” ; Џеф Бриџис, “По секоја цена”; Лукас Хеџис “Манчестер крај морето”; Дев Пател, “Лав”; Мајкл Шенон, “Ноќните животни”

Најдобра споредна актерка

Виола Дејвис, “Прегради”; Наоми Харис, “Месечината”; Никол Кидман, “Лав”; Октава Спенсер, “Скриени броеви”; Мишел Вилијамс, “Манчестер крај морето”

Најдобар странски филм:

“Човек на име Уве”, Шведска; “Мојата земја”, Данска ;”Продавачот”, Иран: “Танна”, Австралија ;”Тони Ердман”, Германија

Најдобра анимација

“Кубо и патот на самураите”: “Моана” ;”Животот како тиквичка” ;”Црвената желка”; “Зоотрополис”

Најдобар документарен филм

“Оган во морето”; “Јас не сум твојот црнец”; “Животот, анимиран “; “Произведено во Америка”; “13”

Најдобро оригинално сценарио

“По секоја цена” – Тејлор Шеридон; “Ла Ла Ленд” – Дамјан Чазел ;”Омар” – Јоргос Лантимос и Ефтимис Филипу ;”Манчестер крај морето” – Кенет Лонерган; “Жените на 20 век” – Мајк Мајлс

Најдобро адаптирано сценарио

“Пристигнување” – Ерик Хајсерер; “Прегради” – Огаст Вилсон ;”Скриени броеви” – Алисон Шредер и Теодор Мелфи ;”Лав” – Лука Дејвис; “Месечината” – Бари Џенкинс и Тејрол Алвин Маккрејни

Најдобра кинематографија:

“Пристигнување” – Брадфорд Јунг ;”Ла Ла Ленд” – Линус Сандгрен ;”Лав” – Грег Фрејзер ;”Месечината” – Џејмс Лакстон ;”Тишина” – Родриго Прието

Најдобра оригинална песна:

“Аudition” од “Ла Ла Ленд” ;”Can not Stop the Feeling!” од “Тролчиња”; “City of Stars” од “Ла Ла Ленд”; “The Empty Chair” од “Историјата на Џејмс Фоли” ;”How Far I’ll Go” од “Моана”

Најдобри визуелни ефекти:

“Диуотер Хоризон”; “Доктор Стрејнџ”; “Книга за џунглата”; “Кубо и патот на самураите”; “Rogue One: Историја од Војна на ѕвездите”

Краткометражен анимиран филм

“Слепиот Вајша” (Blind Vaysha); “Позајмено време” (Borrowed Time); “Круши, јаболковина и цигари” (Pear Cider and Cigarettes); “Бисер” (Pearl); “Пајпер” (Piper).

„Оскар“ се најпознатите и најпрестижните филмски награди во светот.

0

Владимир Алексовски, го прославува пензионирањето со пријателите во една скопска ќебапчилница. Оваа прослава тој посакуваше да биде во ресторан, но вели дека со ниската пензија не може да си го дозволи тој луксуз.

Тој вели дека со неговата прва пензија едвај ги покрил трошоците за половина месец, а за да ги почести пријателите, требало да штеди. Тој не очекува покачување на пензиите, велејќи дека младите ја напуштаат државата, нема нови вработувања и нема кој да го полни фондот.

“Странските инвеститори кои отворија свои компании тука, не плаќаат придонеси во фондот. Тие сакаат да го искористат периодот од 2-5 години и да си заминат. Нивните вработени се запоставени, а да не зборуваме за ниските плати што ги добиваат вработените во овие странски фирми“, изјави Владимир Алексовски – пензионер

Од Агенцијата за вработување и Фондот за пензиско и инвалидско осигурување потврдуваат дека вакуумот во Пензискиот фонд е последица на проектот  „Македонија Вработува”. Според извештајот на Државниот завод за ревизија, секоја година во Фондот има по 8,5 милиони евра помалку за вработените кои не плаќаат придонеси, а на кои им е признат стажот. Но, од ПИОМ истакнуваат дека не можат да дадат точни податоци колку изнесува буџетскиот вакуум во нивната институција, се додека трае проектот „Македонија Вработува”.

 “Фондот за пензиско и инвалидско осигурување на Македонија не прави пресметки за придонесите на овие вработени бидејќи на база на овој проект тие се ослободени и не поседуваат податоци за износот на нивните придонеси. Се додека не заврши проектот “Македонија Вработува 1 и 2”, Фондот не може да даде точни податоци за компликациите во буџетот во иднина”, соопштуваат од ПИОМ.

Академикот Абдулменаф Беџети, вели дека освен фискалната стимулација, големиот дефицит на ПИОМ е предизвикан од структуралниот пад на нормите за пензиско осигурување, што се случи во 2008 година.

 “Нормата за пензиско осигурување е намалена  некаде за околу 30% и нормално дека во 2008 година дефицитот на пензискиот фонд беше некаде околу 35-40 милиони денари, а денес, по 10 години тој е зголемен за десет пати. Дефицитот изнесува околу 450 милиони денари што бара субвенционирање од страна на државниот буџет”, изјави Абдулменаф Беџети – академик.

Според извештајот за Македонија, од Светска Банка се потенцира дека 89% од новите работни места се креирани преку фискално стимулирање. Во 2015 година, од 21 илјада вработени, 18.700 работни места биле креирани од страна на владата преку проектот “Македонија Вработува”. Овој проект продолжува да се реализира и според планираното за периодот 2016-2017, планирани се 15-20 илјади нови работни места. Според Агенцијата за вработување, до крајот на месец февруари ќе бидат вработени над 4300 лица. До крајот на проектот „Македонија вработува 2“ остануваат уште четири месеци.

Аднан Ќаили

0

Коалицијата Преродба со Беса му вети на лидерот на СДСМ, Зоран Заев, дека ќе ги дадат петте потписи, со цел да се формира влада, изјави портпаролот на Беса Орхан Муртезани. Сепак, од таму не сакаат да прецизираат дали ќе бидат дел од новата Влада. Велат Албанската платформа е услов за заедничко владеење, па разговорите со Заев допрва ќе следуваат.

 “Во идната влада не смее да има лица против кои и понатаму се водат истраги во меѓународните судови, но и од Специјалното јавно обвинителство. Да се отвори дискусија за редефинирање на уставно-правниот систем на земјата. Овој договор да биде временски ограничен како и транспарентен за јавноста”, изјави  Орхан Муртезани.

И Алијансата за Албанците своите три мандати им вети на социјалдемократите. На денешното централно Собрание на Движењето за Реформи-ДПА, Зијадин Села рече дека единствениот услов за преговори за заедничко владеење, и понатаму е почитувањето на заедничката албанска платформа.

 “Нашето учество во владата е ограничено со нашата политичка платформа. Еден од главните услови е законот за јазикот, обелоденувањето на политички монтираните процеси, декриминализација на ова општество, на институциите како и економски развој. Затоа, нема да влеземе во владата само колку да фигурираме, туку ќе влеземе во моментот кога ќе се исполнат нашите поставени услови”, изјави Зијадин Села – претседател на ДР-ДПА.

Со истиот став излезе и партијата НДП предводена од Весел Мемеди, од каде одлучија, нивниот единствен мандат, да остане во рамките на коалицијата Алијансата за Албанците.

“НДП покажа стабилен став во однос на албанската платформа, како големо постигнување за албанскиот политички блок, и затоа одлучи да го даде својот потпис како НДП, во рамките на коалицијата Алијанса за Албанците, за реализирање на Албанската платформа”, изјавиВесел Мемеди – претседател на НДП.

Откако ги доби од ДУИ десетте потписи, заедно со нивните 49, но и со оние на БЕСА и Алијанса за Албанците, СДСМ обезбеди мнозинство од 67 мандати. Преостанува само гаранцијата за мнозинст во во парламентот да се достави до Иванов, кој на Заев треба да му го додели мандатот за состав на новата Влада.

Аднан Ќаиљи

0

Претседателот на ВМРО-ДПМНЕ преку својот официјален фејсбук профил се обрати до поддржувачите на партијата, но и до целата јавност во Македонија. Тој обвини дека внатрешни и надворешни центри работат на уништување на државата, на промена на името, на идентитетот на Македонија.

Груевски упати јавна покана до лидерот на СДСМ Зоран Заев, да го уапси и затвори, доколку тоа е условот да дојдат на власт, само како што вели тој, нека се откаже од удирањето врз темелите на државата. Груевски воедно порачува дека кога државата е нападната, само народот може да ја одбрани. Не можат само политичарите, особено кога еден дел од нив се борат за заштита, а друг дел се на спротивната страна, вели Груевски.

Основната причина за целата операција за рушење на власта и носење на Зоран Заев е слабеење на државата со цел промена на името и идентитетот на Македонците. Тоа е главната и основна причина заради која е започната операцијата за рушење на ВМРО од некои надворешни центри. Овој процес може да донесе и до губење на државата. Двојазичноста е секундарната цел. По двојазичноста ќе започнат подготовки и за кантонизација како следна цел. Многу им пречи што во изминатите години низ разни форми и активности се подигна националната свест.

-Му порачувам на Заев и му давам јасна понуда, доколку по секоја цена е решен да стане премиер и доколку цената треба да се работи кои ќе им направат штета на темелите на државата, дека лично му нудам доколку албанските партии го донесат на власт, ако се откаже од спроведувањето на таа агенда, ќе му дадеме поддршка да биде малцинска влада во период во кој ќе се договориме, и ќе има поддршка за сите закони освен оние за редефинирање на државата, кои се понижување на другите етнички заедници, напиша меѓудругото Никола Груевски на својот фејсбук профил.

0

Македонија е единствената земја во Европа која 15 години нема спроведено попис, статистичка операција која е од големо значење за секоја земја. Токму според резултатите од пописот се прават долгорочни планови за тоа колку градинки, училишта, амбуланти, но и други проекти се потребни на една држава.

Дека оваа статистичка операција е од голема  важност зборува и фактот што Популационата комисија на Обединетите нации предложила, заради компарација на податоците, пописите да се обавуваат на крајот на секоја декада или на почетокот на секоја деценија.

Но, во Македонија пописот на населението како да е табу тема. Од Социјалдемократскиот сојуз велат дека во моментов е поважно да се формира Влада, а дури потоа ќе се разговара за оваа статистичка операција.

„Приоритет е прво да се состави Влада, па после сите важни точки за општеството ќе се решаваат. Пописот не е услов за формирање на Влада. Новата Влада во СДСМ ќе ги решава сите потреби на граѓаните на земјата“, изјави Петре Шилегов СДСМ.

Владимир Божиновски од Институтот за политички истражувања вели дека само во Македонија ова техничко прашање станува политички проблем.

„Пописот е техничка операција и очигледно само во Македонија сите имаат проблем пописот да се спроведе. Јас често пати повторувам ако треба нека се направи попис без никакво етничко изјаснување, едноставно потребно е да се види колку луѓе, каде и на која возраст живеат во Македонија. Тие работи не се битни во политичката сфера туку во економско – социјалната сфера. Прво што требаше да се договорат партиите е да се спроведе попис и ако некоја не сака треба да каже зошто не сака иако „Еуростат“ е јасен како што се спроведува попис во сите земји, така треба и во Македонија“, изјави Владимир Божиновски.

Дека статистичката операција се претворила во политички проблем смета и политичкиот аналитичар Петар Арсовски, кој додава дека албанските партии го избегнуваат пописот.

„Кај македонските партии прашањето за пописот е врзано политичка агенда и тоа стана политичко прашање наместо да стане статистичка операција. Кај албанските парти е малку покомплицирано, особено кај ДУИ, затоа што ако ја анализираме платформата, сакаат да ја заменат  класификацијата 20 проценти за користење на јазикот со експлицитниот термин – албански. И мислам дека тоа е причината зошто се одложува пописот“, изјави Петар Арсовски.

Последниот попис беше во 2002 година, од тогаш имаше само еден обид да се спроведе оваа статистичка операција и тоа во 2011 години, но процесот беше прекинат со поднесување на колективна и неотповиклива отставка на пописната комисија. Според последниот попис Македонија има 2.022.547 жители. Од вкупниот број на жители 64,18 проценти се Македонци, 25,17 Албанци, Турци 3,88, Роми 2,66, Срби 1,78, Бошњаци 0,87 и Власи 0.48 проценти. Процентот на албански жители во Македонија од секогаш беше тема на дискусија особено помеѓу политичките партии од различните блокови. Веројатно на истата тема ќе се дискутира уште долго, барем до следниот спроведен попис.

Александра Смилеска

0

Билјана Чонеска е стоматолог и има своја ординација. Таа во 2012 година аплицирала со проект за самовработување и добила грант од државата. Со помош од 3 илјади евра отворила своја стоматолошка ординација.

„Го видов огласот за самовработување,  и тоа беше мотив за јас да ја остварам мојата идеја. Аплицирав во Агенцијата за вработување, бев информирана дека е помината првата селекција, потоа следуваше обука за самовработување и потоа бизнис план. Со тоа добивме гранд и ми беше овозможено да ја отворам својата ординација“, изјави Билјана  Чонеска-стоматолог.

Пред само неколку дена од Агенцијата за вработување информираа дека, по злоупотребата на грантовите оперативниот план е сменет. Сега, доколку лицето кое добило грант, не ги исполнува обврските кон државата во одреден временски период, ќе мора да го врати целиот износ на средства.

Но, како што вели директорот на агенцијата Влатко Поповски, поради тоа што во буџетот има доволно средства, годинава сумата од 3 илјади е зголемена на 4 илјади евра.

„Ова е 11 оперативен план која што ја предвидуваме мерката за само вработување со не повратни средства, со една разлика што од 2016 година доделувавме 3.000 евра не повратни, а во 2017 година веќе е зголемувана оваа сума на 4.000 евра“, изјави Влатко Поповски директор на АВРМ.

Сепак, според поранешниот претседател на Народбата банка и економски експерт, Петар Гошев ваквите вработувања претставуваат голем финансиски товар за државата. Како што вели, тоа се фискално скапи работни места според Меѓународниот моментарен фонд, Светска Банка, но и Европската комисија.

Гошев додава дека станува збор само за реклама на Владата и реалниот број на вработени преку ваквите програми е многу помал, од бројката што се прикажува.

„Направена е голема пропаганда во изминативе 10 години, дека владата посветува големо внимание на вработувањето. Меѓутоа сите мерки во областа на вработувањето не дадоа резултати или дадоа многу слаби резултати.(01 26)Тие работни места кои што владата ги отвора, меѓународните институции ги нарекуваат стручно фискални скапи работни места, затоа што се даваат многу даночни пари, а ефектите на бројот на вработените е мал“, изјави Петар Гошев економист.

Од 2007 до 2016 година преку програмата за самовработување основани се 8 730 компании во кои вработени се 8 969 лица.

Но, според економистот Петар Гошев, кога државата е најголем работодавач, тоа значи  дека економијата е слаба и се отвораат малку работни места. Како што вели тој, тоа воедно е знак дека имаме нефункционална економија.

Сабина Љазумова

0

Интелектуалци, актери, аналитичари, професори во последно време се погласно зборуваат за одредени црни сценарија доколку Владата ја предводи Зоран Заев. На социјалните мрежи се пишува за можни меѓуетнички конфликти, дури и граѓанска војна. Најсвеж пример е објавениот статус на аналитичарот Тони Науновски, кој вели дека претседателот Иванов не сме да му го даде мандатот на Зоран Заев затоа што тој ќе спровел антиуставна програма и целосна двојазичност во државата.

Во статусот на Фејсбук, тој предупредува на можен државен удар.

„Ако случајно оние од СДСМ и БЕСА, Села (па и ДУИ) се обидат сами да свикаат седница на Собрание и направат влада (што им е планот од поодамна, според мои извори од СДСМ) тогаш тоа ќе биде државен удар и Претседателот на државата (врховен командант на војската и полицијата) прогласува воена состојба и ќе се апсат сите што ќе учествуваат во државниот удар“, фб статус на Тони Науноски.

Режисерот Борис Дамовски, пак во Клик Плус на ТВ 21, рече, дека опасност од конфликт не постои и дека не е точно дека членството на ВМРО-ДПМНЕ се мобилизира, за такви активности.

„Моментот што сега се наметнува дека ВМРО-ДПМНЕ наеднаш се мобилизира , за разлика од нивните опоненти, кои беа вистински мобилизирани по разни штабови, Бихаќка, по разно-разни НВО, па дури и амбасади. Тогаш моментот беше тензичен, а не сега“, изјави Борис Дамовски.

Граѓанскиот активист, Замир Мемети, смета дека на овој начин се шири говор на омраза со цел народот да наседне на тие провокации. Но, сепак Мемети додава, дека Македонците и Албанците го положиле тестот на зрелоста уште со мајските настани во Куманово.

„Македонија во последните години покажа силен граѓански концепт. Времињата во Македонија се менуваат и се гради една одлична доверба меѓу етничките заедници. Дека е тоа така покажаа и протестите на Шарената револуција каде што сите бевме шарени, без разлика дали некој е Албанец или Македонец“, изјави Замир Мемети-граѓански активист.

Деновиве во контекст на настаните, протести одржаа неформалната група „Тврдокорни“, против двојазичноста, а пред општинскиот комитет во Охрид, беше прочитан прогласот на партијата со кој на протести се повикуваат  сите граѓани да ја одбранат државата од Зоран Заев и спроведување на т.н план за федерализација. Извршниот комитет на партијата истиот ден порача дека ВМРО-ДПМНЕ ќе се спротивстави на донесување на Закон за јазици и ќе преземе соодветни мерки за да се заштити „волјата на мнозинството“.

Габриела Д.Мишевска

0

Пукнати ѕидови и покрив кој во секој момент може да падне, таква е состојбата во ОУ „Васил Главинов„ во Чаир. Овие оштетувања на училишната зграда се последица од земјотресите што се почувствуваа во Скопје во септември, но се уште не се санирани.  Еден дел од училиштето со 12 училници е вон употреба, а наставата се следи во другиот, поздрав дел од зградата.  Во вакви околности, дел од учениците и натаму наставата ја следат во соседното уличиште за возрасни Антон Семјенивиќ- Макаренко.

“имавме родителска на која ги запознавме родителите дека поради објективни причини учениците за определено време ќе бидат во училиштето Макаренко. Со тоа нема да има застој во образовниот процес“, изјави Ќамуран Кучи  – директор на ОУ  „Васил Главинов“.

Но, родителите апелираат што побрзо да се реновира оштетениот дел, а учениците да се вратат во своите училници. Наместо во другата зграда каде што тврдат дека не се соодветни условите:

 “Овде учат ученици од прво и второ одделение. Бидејќи е оштетен тој дел, префрлени се во ова училиште. Не знам кога ќе се вратат во своите клупи, но наставниците тука се грижат за нашите деца”, изјави Исмет Битиќи родител.

Во Министерството за образование велат дека имаат фонд во износ од 33 милиони денари за реновирање на повеќе училишта оштетени од серијата земјотреси, вклучувајќи го  ОУ „Васил Главинов“.

 “ Во 2016 изработивме техничка документација која го опфаќа целиот објект, без разлика каде се штетите. Проектантите не известија дека биле излезени и на терен. Рокот за подготовка е 4 месеци, а потоа се објавува тендер“, соопштуваат од МОН.

Комисијата на Сеизмолошкиот завод заедно со министерството за образование минатата година констатираше дека земјотресот предизвикал значителни штети во дел од ова училиште, поради што издадоа налог просториите да не се употребуваат занастава.

Мирадие Хасани

0

Социјалдемократскиот сојуз на Македонија се уште размислува како да го побара мандатот за формирање Влада од Иванов, велат извори од партијата за ТВ 21. Неофицијално, во игра се две опции. Едната е Заев со документот да оди лично во претседателскиот кабинет, а другиот начин е по институционален пат, односно со писмено известување од Собранието до Вила Водно.

„Иако побаравме одговор од седиштето на СДСМ на Бихаќка не сакаа да откријат детали за тоа како Заев ќе го побара мандатот за формирање Влада од Иванов. Добивме одговор дека партијата конечно ќе се произнесе во текот на утрешниот ден“

ТВ 21 побара информации и од службата за односи со јавност на претседателот Иванов кој во овој момент е најповикуваната политичка фигура во државата. Но и од таму не откриваат која ќе биде следната постапка на претседателот.

„Од кабинетот на Иванов не откриваат детали дали и кога претседателот ќе му го даде мандатот за формирање нова Влада на лидерот на социјалдемократите, кој завчера ги обезбеди потребните потписи откако доби поддршка од ДУИ“

Кога на први февруари претседателот Иванов ги консултираше лидерите на политичките партии, кои влегоа во Собранието, во своето обраќање освен 61 потпис побара и зачувување и зацврстување на унитарниот карактер на државата.

„Како што веќе истакнав во моето годишно обраќање до вас, граѓаните, од оние што ќе ја составуваат новата влада барам во својата програма да имаат два клучни приоритета: Прво, заштита на државните интереси на Република Македонија, што подразбира зачувување и зацврстување на унитарниот карактер на државата. Второ, системска реформа по кризата во која ќе бидат опфатени субјектите на системот за национална безбедност на Република Македонија“, изјави Ѓорге Иванов  претседател на РМ.

Во текот на вчерашниот ден, со писмена изјава се огласи и еврокомесарот Јоханес Хан. Тој го повика Претседателот, но и Собранието, да постапат согласно Уставот и мандатот да го дадат на партијата која има обезбедено мнозинство во законодавниот дом.

Пред три дена, при неговата посета на Сараево, лидерот на СДСМ Зоран Заев најави дека во првата половина од месец март ќе биде формирана новата Влада.

Антонио Крстевски

0

Македонија е меѓу земјите во регионот со јавен долг, кој достигна 3,4 милиарди евра, што според статистиката на Светска банка е 38 отсто од БДП.  Јавниот долг на Црна Гора  изнесува 2,3 милијарди долари, што е речиси 60 отсто од БДП. Освен Црна Гора и Албанија и Хрватска се земји во регионот кои, според новите глобални економски прогнози на Светска банка, се соочуваат со ризик од зголемување на јавниот долг.
Во регионот, во Босна и Херцеговина, јавниот долг изнесува 41,5 отсто од БДП, или 6 милијарди евра. Србија е задолжена со 25,1 милијарди евра, што е 72,9 отсто од БДП. Најмалку задолжена држава во регионот е Косово, со 14,5 отсто од БДП, или 852 милиони евра. Јавниот долг по жител, кој се добива со делење на сумата на долгот со бројот на жителите на државата, за Македонија изнесува 2.599,7 евра. Помал долг по жител имаат Босна и Херцеговина и Косово, додека долгот на секој Словенец изнесува 16.500 евра.

Facebook Auto Publish Powered By : XYZScripts.com