0

Четири рочишта за предмети на Специјалното јавно обвинителство се закажани неделава во Кривичниот суд.

За утре и за 14 декември закажани се рочиште за предметот на СЈО „Труст“, во кој првоосомничен е бизнисменот Сеад Кочан и уште две физички и три правни лица, меѓу кои и управителите на фирмите „Трансмет“, „Силекс“ и „Вато“ ДООЕЛ, за учество на тендер на Електрани на Македонија.

В среда, на 13 декември, ќе се одржи судење за случајот „Транспортер“, што се однесува на злоупотреби со превоз за ученици од страна на поранешниот градоначалник на Битола Владимир Талески и претседателот на локалната Комисија за јавни набавки, при што се осомничени дека злоупотребиле речиси 360.000 евра од државниот буџет.

На 14 декември треба да се одржи рочиште  предметот „Шпион“. Меѓу обвинетите се и поранешниот полициски генерал Горан Стојков,  поранешниот директор на Управата за спречување на пари и корупција Ване Цветанов и поранешниот висок функционер во Управата за контраразузнавање Александар Диневски.

На 13 декември, пак, во Судот во Солун е закажано рочиште за барањето од македонските власти за екстрадиција на Горан Грујевски и Никола Бошковски, обвинети од СЈО за предметот „Таргет-Тврдина“

0

Комисијата за европски прашања на која требаше да почне амандманската расправа за Предлог законот за употреба на јазиците е одложена поради, како што појасни, претседателот на Комисијата Артан Груби неприсуство на претставници од Министерството за правда.

– Министерот за правда ме извести дека е во Летонија, и ние го очекувавме заменикот. Мора да има претставник на Владата кој ќе се изјасни за 90-те амандмани што се поднесени за Законот. За нејзиното продолжение ќе информирам во текот на денешниот ден или утре, изјави Груби.

Роковите предвидени со Деловникот веќе течат, но се почитуваат, тврди тој иако има само три дена за амандманска расправа.

Негови очекувања се дека пратениците од ВМРО-ДПМНЕ и коалицијата ќе дојдат на продолжението и дека ќе ги бранет своите амандаман и дека тие ќе гласаат за законот.

0

Претседателот на Владата на Република Македонија Зоран Заев утре ќе престојува во еднодневна официјална посета на Косово.

Заев ќе се сретне со неговиот косовски колега  Рамуш Харадинај, а ќе има средби и со претседателот на Косово Хашим Тачи и со претседателот на косовското Собрание, Кадри Весели.

За време на престојот во Косово, македонскиот премиер ќе се сретне со претставници на Македонско – косовската бизнис заедница.

Во македонската делегација, што ја предводи премиерот Заев, ќе бидат и министерот за економија Крешник Бектеши, министерот за транспорт и врски Горан Сугарески, министерот за култура Роберт Алаѓозовски, како и министерот без ресор задолжен за дијаспора Едмонд Адеми.

Посетата на Заев е прва официјална посета на премиер на Република Македонија на Република Косово.

0

Семејствотво на Рами Јусуфов кој загина во скопското село Љуботен во 2001 година, побарува надомест за материјална и нематеријална штета од еден милион евра, за што ќе се расправа на ново судско рочиште кое е закажано денеска во Основниот суд Скопје 2.

Тужителите Елмаз и Занел Јусуфови со посебен поднесок побараа тужбата да биде проширена и за Јохан Тарчуловски кој е во притвор, зашто со пресуда на Судот во Хаг, тој беше осуден за воени злосторства врз цивилно население.

Тарчуловски беше спроведен во затворот во Шевенинген на 16 март 2005 година, по барање на Хашкиот трибунал. Тој беше осуден на затворска казна од 12 години во 2008 година, а беше ослободен на 10 април 2013 година.

0

Израелскиот прeмиер Бенјамин Нетанјаху денеска изјави  дека очекува и голем дел од државите од Европската унија да го признаат Ерусалим за главен град на Израел.

Тој ја даде таа изјава во Брисел, пред состанокот со министри за надворешни работи на ЕУ и оцени дека таквиот чекор ќе придонесе за мирот на Блискиот исток.

Тој ги повика Палестинците да го признаат Израел како еврејска држава и да го прифатат Ерусалим за главен град.

Непосредно пред него, високата претставничка за надворешна и безбедносна политика на ЕУ Федерика Могерини изјави дека Унијата ќе продолжи да го почитува „меѓународниот консензус“ во врска со Ерусалим.

Посетата на нетанјаху е прва посета на еден израелски премиер во ЕУ во последните 22 години. 

0

Претседателот на Република Македонија Ѓорге Иванов од денеска ќе престојува во официјална посета на Федеративна Република Бразил.

Иванов, како што соопшти неговиот кабинет, утре во Бразилија со највисоки државни почести ќе биде примен од претседателот на Федеративна Република Бразил, Мишел Темер.

Во рамки на официјалната посета на Бразил, Иванов ќе присуствува на свеченото отворање на Амбасадата на Република Македонија во Бразилија, прва резидентна македонска Амбасада во Латинска Америка.

За време на официјалната посета на Федеративна Република Бразил, предвидено е претседателот Иванов да оствари средби со Пауло Скаф, претседател на Федерацијата на индустрии на Сао Паоло и Едуардо Виера, претседател на Федерацијата на индустрии на Рио де Жанеиро.

Македонскиот претседател ќе одржи предавање на тема „Европската бегалска криза – научени лекции” во Бразилскиот центар за меѓународни односи.

Ова е прва официјална посета на претседател на Република Македонија на Федеративна Република Бразил и на Латинска Америка.

0

Првиот ден од новата брза железничка линија на „Дојче банк“, што ги поврзува Берлин и Минхен, измина во непријатности поради доцнење. Возот од Минхен кон главниот град на Германија имаше технички проблеми во Нирнберг и беше префрлен на спора линија. Во Берлин стигна два часа подоцна отколку што беше планирано.

Возовите на брзата линија одат со бризна и до 300 км/час и би требало патувањето да се намали од шест часа на помалку од четири часа.

Германската железница ја отвори новата линија на брзи возови од Белин до Минхен со надеж дека ќе биде конкурент на авио- сообраќајот, бидејќи го намалува времето за патување.

0

Во Истанбулскиот суд за тешки кривични дела денеска започнува случајот против извршителите на терористичкиот напад на новогодишната ноќ во клубот „Реина”, при што беа убиени 39 лица, а над 100 лица беа повредени.

Главниот обвинет е Абдулкадир Машарипов, уапсен од турската полиција по речиси едномесечно потрага. Заедно со него, на обвинителната клупа денеска ќе се појават уште 56 лица. Од безбедносни причини, судењето ќе се одвива во затворот Силиври, во близина на Истанбул.

Вкупно 122 лица, од кои 60 странци, се повикани да сведочат како повредени или тужители.

Обвинителството бара за Масарипов 40 пати доживотен затвор. Исто толкава казна се бара и за Илијас Машарипов, Абдураф Серт, Али Џамал ​​Мохамед и за сопругата на Машарипов Зарина Нурулаева.

За другите обвинети, се бараат вкупноп 2.370 години затвор.

Според обвиненителниот акт, оружјето и експлозивите користени при терористичкиот акт биле увезени непосредно пред нападот, преку различни келии на „Исламска држава“..

По нападот во турската полиција, биле добиени известувања за 2000 лица. Во операциите на турската полиција, 642 лица беа уапсени, и тоа сите странци, кои беа екстрадирани.

Според обвинителството, сите терористи на ИД користеле кодни имиња.

Откако бил уапсен во стан во населбата Есенјурт каде се криел, при сослушувањето Машарипов призна дека е член на ИД и дека дошол во Истанбул од Сирија, за да се „одмазди на христијаните на нивниот најголем празник”, Нова година, која во Истанбул традиционално се прославува на плоштадот Таксим. Поради зголеменото полициско присуство, тој не успеал да изведе напад на Таксим, се вратил и го извршил нападот во „Реина”.

Вкупно 39 луѓе беа убиени и над 100 повредени, главно туристи од арапските земји,  во ноќниот клуб во Истанбул откако напаѓачот, облечен како Дедо Мраз влегол и пукал во гостите. Нападот се случи неколку минути по полноќ во познатиот ноќен клуб Реина, во областа Бешикташ во европскиот дел на Истанбул на брегот на Босфор. Во клубот имало новогодишна забава. Во мај годинава, клубот беше урнат.

0

 Земјоделците не се задоволни од Министерството за зeмјоделство, шумарство и водостопанство (МЗШВ) и неговата работа ја оценуваат со „двојка“, покажува најновата анализа на Рурална коалиција.

Критиките главно се однесуваат на периодот од 2013 до 2016 година, а незадоволството е особено големо заради нефункционалноста на работните тела кои треба да го обезбедат учеството на земјоделците во креирањето и спроведувањето политики во оваа област.

Како што наведува Рурална коалиција на својот фејсбук профил, ова се перцепциите и ставовите на 400 земјоделци од сите региони во државата, анкетирани во периодот октомври – ноември 2017.

Комплетните резултати од теренското истражување и анализата за транспарентноста на МЗШВ, Рурална коалиција ќе ги објави утре, на прес-конференција.

Истражувањето и анализата се дел од проектот „Отчетност за сработеното со парите на граѓаните – реформа на јавната администрација која тешко се достигнува“ што се реализира во рамки на проектот „Граѓанска алијанса за транспарентност – набљудување на процесот на реформи на јавната администрација од страна на граѓанските организации“, со поддршка од ЕУ. 

0

Србија денеска на Меѓувладина конференција во Брисел ќе отвори уште две поглавја во пристапните преговори со ЕУ – поглавје 6 што се занимава со правата на економските друштва и поглавје 30 за економски односи со странство, јави Танјуг.

Државите членки на ЕУ одлучија да и дадат на Србија „зелено светло“ за отворање на уште две поглавја со што вкупно ќе бидат отворени 12 поглавја.

Пред конечната одлука за отворање нови поглавја државите членки забележаа напредок на Србија во рамки на поглавјата 23 и 24, кои се однесуваат на реформите во областа на владеење на правото во државата, како  напредок во процесот на нормализација на односите со Приштина.

Според Танјуг, сите држави не биле задоволни со вкупниот напредок на Србија во исполнувањето на Акцискиот план за поглавјето 23, што се однесува за реформите во правосудството, антикорупциската политика и основните права и правата на државјаните на ЕУ.

Во ЕУ очекуваат Србија во првиот дел од 2018 година да отвори уште три нови поглавја.

Facebook Auto Publish Powered By : XYZScripts.com